ദോഹ: ഖത്തറിലെ ഇന്ത്യൻ സമൂഹത്തിന്റെ നേതൃത്വത്തിൽ ഇന്ത്യയുടെ പുതിയ അംബാസഡർ ഡോ. കെ. ശ്രീകർ റെഡ്ഡിക്ക് ഇന്ന് സമൂഹ സ്വീകരണം നൽകും. ഇന്ത്യൻ കൾച്ചറൽ സെന്റർ (ICC), ഇന്ത്യൻ കമ്മ്യൂണിറ്റി ബെനവലന്റ് ഫോറം (ICBF), ഇന്ത്യൻ സ്പോർട്സ് സെന്റർ (ISC), ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (IBPC) എന്നിവയുടെ സംയുക്താഭിമുഖ്യത്തിലാണ് സ്വീകരണം സംഘടിപ്പിക്കുന്നത്.
ഖത്തറിലെ ഇന്ത്യൻ അംബാസഡറായി ചുമതലയേറ്റ ഡോ. കെ. ശ്രീകർ റെഡ്ഡിയെ ഇന്ത്യൻ സമൂഹത്തിലേക്ക് ഔദ്യോഗികമായി സ്വാഗതം ചെയ്യുന്നതിനായാണ് പരിപാടി. പുതിയ ദൗത്യകാലയളവിന് ആശംസകളും പിന്തുണയും അറിയിക്കുന്നതിനൊപ്പം ഖത്തറിലെ ഇന്ത്യൻ സമൂഹത്തിന്റെ വിവിധ മേഖലകളിലുള്ള പ്രതിനിധികൾ അദ്ദേഹവുമായി ആശയവിനിമയം നടത്തുന്നതിനും സ്വീകരണം വേദിയാകും.
ഇന്ന്, സെപ്റ്റംബർ 14 തിങ്കളാഴ്ച വൈകിട്ട് 7 മണിക്ക് ദോഹയിലെ ICC അശോക ഹാളിലാണ് സമൂഹ സ്വീകരണം നടക്കുക. ഖത്തറിലെ ഇന്ത്യൻ സമൂഹാംഗങ്ങൾ പരിപാടിയിൽ പങ്കെടുക്കണമെന്ന് സംഘാടകർ അഭ്യർഥിച്ചു.
ഖത്തറും ഇന്ത്യയും തമ്മിലുള്ള ശക്തമായ ബന്ധം കൂടുതൽ ഊട്ടിയുറപ്പിക്കുന്നതിലും ഖത്തറിലെ ഇന്ത്യൻ സമൂഹത്തിന്റെ ക്ഷേമവും വിവിധ മേഖലകളിലെ സഹകരണവും ശക്തിപ്പെടുത്തുന്നതിലും പുതിയ അംബാസഡറുടെ കാലാവധി നിർണായകമാകുമെന്ന പ്രതീക്ഷയിലാണ് ഇന്ത്യൻ സമൂഹം.