റമദാനും ക്രിസ്മസും ഓണവും ഒരുമിച്ച് ആഘോഷിക്കുന്ന കേരളത്തിന്റെ മതസൗഹാർദ പാരമ്പര്യത്തെ പ്രശംസിച്ച് ഉപരാഷ്ട്രപതി സി.പി. രാധാകൃഷ്ണൻ
കോഴിക്കോട്: റമദാനും ക്രിസ്മസും ഓണവും ഒരുമിച്ച് ആഘോഷിക്കുന്ന കേരളത്തിന്റെ മതസൗഹാർദ പാരമ്പര്യത്തെ പ്രശംസിച്ച് ഉപരാഷ്ട്രപതി സി.പി. രാധാകൃഷ്ണൻ. വിവിധ മതവിഭാഗങ്ങളിൽപ്പെട്ടവർ പരസ്പരം ആഘോഷങ്ങളിൽ പങ്കുചേരുന്ന കേരളത്തിന്റെ സാമൂഹിക അന്തരീക്ഷം രാജ്യത്തിന്റെ വൈവിധ്യത്തിലും ഐക്യത്തിലും അധിഷ്ഠിതമായ പാരമ്പര്യത്തിന്റെ പ്രതിഫലനമാണെന്ന് അദ്ദേഹം പറഞ്ഞു.
കോഴിക്കോട് കേസരി ഭവനിൽ വെള്ളിയാഴ്ച നടന്ന നവരാത്രി സർഗോത്സവം ഉദ്ഘാടനം ചെയ്ത് സംസാരിക്കുകയായിരുന്നു ഉപരാഷ്ട്രപതി. രാഷ്ട്രീയ അക്രമങ്ങൾ ഒഴികെ കേരളം പൊതുവെ അക്രമരഹിതമായ സംസ്ഥാനമാണെന്ന് നിരീക്ഷിച്ച അദ്ദേഹം, രാഷ്ട്രീയ അക്രമങ്ങളും ഗണ്യമായി കുറഞ്ഞിട്ടുണ്ടെന്നും അവ പൂർണമായി ഇല്ലാതാകുമെന്ന പ്രതീക്ഷയുണ്ടെന്നും വ്യക്തമാക്കി.
രാഷ്ട്രീയ അക്രമങ്ങൾ അവസാനിച്ചാൽ കേരളത്തിന് വീണ്ടും ‘ദൈവത്തിന്റെ സ്വന്തം നാട്’ എന്ന വിശേഷണം കൂടുതൽ അർഥവത്തായി വീണ്ടെടുക്കാനാകുമെന്ന് അദ്ദേഹം പറഞ്ഞു. അനീതിക്കെതിരെ നിലകൊള്ളുന്നതിലാണ് ധൈര്യമുള്ളതെന്നും മറ്റുള്ളവരെ ആക്രമിക്കുന്നതിലല്ലെന്നും അദ്ദേഹം ഓർമിപ്പിച്ചു.
നവരാത്രിയുടെ സന്ദേശം ഭയത്തെ മറികടക്കുന്ന ധൈര്യവും അനീതിക്കുമേൽ നീതിയുടെ വിജയവും അജ്ഞതയെ അകറ്റുന്ന അറിവുമാണെന്ന് ഉപരാഷ്ട്രപതി പറഞ്ഞു. വ്യത്യസ്ത ഭാഷകളും ആചാരങ്ങളും ആരാധനാരീതികളും നിലനിൽക്കുമ്പോഴും ഇന്ത്യയെ ഒരുമിപ്പിക്കുന്നത് പൊതുവായ സാംസ്കാരിക പൈതൃകമാണെന്നും അദ്ദേഹം ചൂണ്ടിക്കാട്ടി.
രാജ്യത്തിന്റെ സാംസ്കാരിക പൈതൃകം സംരക്ഷിക്കുന്നതിനൊപ്പം വികസനലക്ഷ്യങ്ങളുമായി മുന്നോട്ടുപോകേണ്ടതിന്റെ പ്രാധാന്യവും അദ്ദേഹം എടുത്തുപറഞ്ഞു. കേരള ഗവർണർ രാജേന്ദ്ര വിശ്വനാഥ് ആർലേക്കർ, രാജ്യസഭാംഗം സി. സദാനന്ദൻ തുടങ്ങിയവർ ചടങ്ങിൽ പങ്കെടുത്തു. കലാരംഗത്തെ സംഭാവനകൾ പരിഗണിച്ച് പി.ആർ. രാജേന്ദ്രന് ഉപരാഷ്ട്രപതി സർഗ കേസരി പുരസ്കാരം സമ്മാനിച്ചു.