സ്വാധീനമോ രാഷ്ട്രീയ ബന്ധമോ ഉപയോഗിച്ച് നിയമത്തിന്റെ പിടിയിൽനിന്ന് രക്ഷപ്പെടാമെന്ന ധാരണ വേണ്ടെന്ന് ആഭ്യന്തരമന്ത്രി
തിരുവനന്തപുരം: കേരളത്തിൽ ഗുണ്ടാ പ്രവർത്തനങ്ങളും സംഘടിത കുറ്റകൃത്യങ്ങളും ഇനി വച്ചുപൊറുപ്പിക്കില്ലെന്ന് ആഭ്യന്തരമന്ത്രി രമേശ് ചെന്നിത്തല. പൊതുജനങ്ങളുടെ ജീവനും സ്വത്തിനും സംരക്ഷണം ഉറപ്പാക്കാൻ സർക്കാർ ശക്തമായ നടപടികളുമായി മുന്നോട്ടുപോകുമെന്നും അദ്ദേഹം വ്യക്തമാക്കി. ഗുണ്ടകളെ ഉപയോഗിച്ച് സ്വാർഥ താൽപര്യങ്ങൾ സംരക്ഷിക്കുന്നവർക്കും അവരെ വളർത്തുകയും ഒളിവിൽ കഴിയാൻ സഹായിക്കുകയും ചെയ്യുന്നവർക്കും നിയമത്തിന് മുന്നിൽ മറുപടി പറയേണ്ടിവരുമെന്നും മന്ത്രി മുന്നറിയിപ്പ് നൽകി.
ഗുണ്ടാ സംഘങ്ങളുടെ പ്രവർത്തനങ്ങൾക്ക് പിന്നിൽ ആരൊക്കെയാണെന്ന് കണ്ടെത്തി അവർക്കെതിരെയും ശക്തമായ നടപടി സ്വീകരിക്കും. കുറ്റകൃത്യങ്ങളിൽ നേരിട്ട് പങ്കാളികളാകാത്തവരാണെന്ന പേരിൽ ഗുണ്ടകൾക്ക് സംരക്ഷണം നൽകുന്നവർക്കും നിയമനടപടിയിൽ നിന്ന് ഒഴിഞ്ഞുമാറാനാകില്ലെന്നും ചെന്നിത്തല പറഞ്ഞു.
സംസ്ഥാനത്ത് ക്രമസമാധാനം ഉറപ്പാക്കുന്നതിൽ സർക്കാർ യാതൊരു വിട്ടുവീഴ്ചയും ചെയ്യില്ല. സാധാരണക്കാരുടെ സുരക്ഷയ്ക്ക് ഭീഷണിയാകുന്ന തരത്തിലുള്ള പ്രവർത്തനങ്ങൾക്കെതിരെ കർശന നടപടി തുടരും. നിയമം എല്ലാവർക്കും ഒരുപോലെയാണ്. സ്വാധീനമോ രാഷ്ട്രീയ ബന്ധമോ ഉപയോഗിച്ച് നിയമത്തിന്റെ പിടിയിൽനിന്ന് രക്ഷപ്പെടാമെന്ന ധാരണ വേണ്ടെന്നും ആഭ്യന്തരമന്ത്രി വ്യക്തമാക്കി.
ഗുണ്ടാ പ്രവർത്തനങ്ങളും സംഘടിത കുറ്റകൃത്യങ്ങളും തടയുന്നതിനായി പൊലീസ് സംവിധാനം ശക്തമായി ഇടപെടും. പൊതുജനങ്ങളുടെ ജീവനും സ്വത്തിനും സുരക്ഷ ഉറപ്പാക്കുക എന്നതാണ് സർക്കാരിന്റെ പ്രധാന ഉത്തരവാദിത്തമെന്നും മാധ്യമങ്ങളോട് സംസാരിക്കവെ രമേശ് ചെന്നിത്തല പറഞ്ഞു.
