കണ്ണൂർ: അഞ്ചരക്കണ്ടി ഡെന്റൽ കോളജ് വിദ്യാർഥി നിതിൻ രാജിന്റെ മരണവുമായി ബന്ധപ്പെട്ട കേസിൽ ഒന്നാം പ്രതിയായ ഡോ. എം.കെ. റാമിനെ ക്രൈംബ്രാഞ്ച് വീണ്ടും അറസ്റ്റ് ചെയ്തു. തലശ്ശേരി എസ്.സി/എസ്.ടി പ്രത്യേക കോടതി പുനരറസ്റ്റിന് അനുമതി നൽകിയതിന് പിന്നാലെയാണ് നടപടി.
നേരത്തെ അറസ്റ്റിലായിരുന്ന ഡോ. റാമിനെ നടപടിക്രമങ്ങൾ പാലിച്ചില്ലെന്ന് ചൂണ്ടിക്കാട്ടി കോടതി വിട്ടയച്ചിരുന്നു. തുടർന്ന് വീണ്ടും അറസ്റ്റ് ചെയ്യുന്നതിനായി ക്രൈംബ്രാഞ്ച് കോടതിയെ സമീപിക്കുകയായിരുന്നു. അറസ്റ്റ് ചെയ്യുമ്പോൾ കാരണം വ്യക്തമാക്കുകയും നിയമപരമായ നടപടികൾ കൃത്യമായി പാലിക്കുകയും വേണമെന്ന് കോടതി നിർദേശിച്ചിരുന്നു.
കോടതി അനുമതി ലഭിച്ചതിന് പിന്നാലെ ഡോ. റാം ക്രൈംബ്രാഞ്ച് ഓഫീസിൽ ഹാജരായതായും തുടർന്ന് അറസ്റ്റ് രേഖപ്പെടുത്തിയതായും റിപ്പോർട്ടുകൾ പറയുന്നു.
അഞ്ചരക്കണ്ടി ഡെന്റൽ കോളജിലെ വിദ്യാർഥിയായിരുന്ന നിതിൻ രാജിന്റെ മരണവുമായി ബന്ധപ്പെട്ട് അധ്യാപകർക്കെതിരെ ഉയർന്ന ആരോപണങ്ങളിലാണ് അന്വേഷണം നടക്കുന്നത്. കേസിൽ ഡോ. എം.കെ. റാമിനെ മുഖ്യപ്രതിയായാണ് അന്വേഷണ സംഘം പരിഗണിക്കുന്നത്.
മൂന്ന് മാസത്തോളം ഒളിവിലായിരുന്ന ഡോ. റാമിനെ ക്രൈംബ്രാഞ്ച് നേരത്തെ കർണാടകയിലെ കുടകിൽ നിന്ന് പിടികൂടിയിരുന്നു. തുടർന്ന് കോടതിയിൽ ഹാജരാക്കിയെങ്കിലും അറസ്റ്റിലെ നടപടിക്രമങ്ങളെച്ചൊല്ലി നിയമനടപടികൾ തുടരുകയായിരുന്നു.
കേസിലെ തുടർ അന്വേഷണത്തിനും ചോദ്യം ചെയ്യലിനുമായി ക്രൈംബ്രാഞ്ച് ഇനി കോടതിയിൽ കസ്റ്റഡി അപേക്ഷ നൽകുമെന്നാണ് സൂചന.
