തിരുവനന്തപുരം: കേരളത്തിൽ പാമ്പുകടിയേറ്റ് സംഭവിക്കുന്ന മരണങ്ങളും അതുമൂലമുണ്ടാകുന്ന സ്ഥിരവൈകല്യങ്ങളും 2030ഓടെ പൂർണമായും ഇല്ലാതാക്കുകയെന്ന ലക്ഷ്യത്തോടെ രൂപീകരിച്ച *‘കേരള സംസ്ഥാന പാമ്പുകടി പ്രതിരോധ നിയന്ത്രണ കർമ്മപദ്ധതി’ (Kerala State Action Plan for Prevention and Control of Snakebite Envenoming – KSAPSE)*യ്ക്ക് സംസ്ഥാന സർക്കാർ ഔദ്യോഗിക അംഗീകാരം നൽകി. ഇതുസംബന്ധിച്ച ഉത്തരവ് ആരോഗ്യ വകുപ്പ് പുറത്തിറക്കി.
ലോകാരോഗ്യ സംഘടന (WHO) മുന്നോട്ടുവെച്ചിരിക്കുന്ന 2030ഓടെ പാമ്പുകടിയേറ്റ് ഉണ്ടാകുന്ന മരണങ്ങളും വൈകല്യങ്ങളും 50 ശതമാനം കുറയ്ക്കുക എന്ന ആഗോള ലക്ഷ്യത്തേക്കാൾ മുന്നേറി, കേരളത്തിൽ ഇത്തരം മരണങ്ങളും വൈകല്യങ്ങളും പൂർണമായും ഇല്ലാതാക്കുക എന്നതാണ് സംസ്ഥാനത്തിന്റെ ലക്ഷ്യം.
സംസ്ഥാനത്ത് ഓരോ വർഷവും നൂറുകണക്കിന് പേർ പാമ്പുകടിയേറ്റ് ചികിത്സ തേടുന്ന സാഹചര്യത്തിലാണ് സമഗ്രമായ പ്രവർത്തനപദ്ധതി സർക്കാർ നടപ്പാക്കുന്നത്. ഗ്രാമപ്രദേശങ്ങൾ, വനമേഖലകൾ, തോട്ടം മേഖലകൾ എന്നിവിടങ്ങളിലെ ജനങ്ങളാണ് കൂടുതലായി പാമ്പുകടിക്ക് ഇരയാകുന്നത്. കൃത്യസമയത്ത് ചികിത്സ ലഭിക്കാത്തതും അവബോധക്കുറവും പലപ്പോഴും മരണത്തിനും ഗുരുതര ആരോഗ്യപ്രശ്നങ്ങൾക്കും കാരണമാകുന്ന സാഹചര്യവും പരിഗണിച്ചാണ് പുതിയ പദ്ധതി തയ്യാറാക്കിയിരിക്കുന്നത്.
പ്രധാന ലക്ഷ്യങ്ങൾ
* 2030ഓടെ പാമ്പുകടിയേറ്റ് ഉണ്ടാകുന്ന മരണങ്ങൾ പൂർണമായും ഇല്ലാതാക്കുക.
* പാമ്പുവിഷബാധയെ തുടർന്ന് ഉണ്ടാകുന്ന സ്ഥിരവൈകല്യങ്ങൾ ഒഴിവാക്കുക.
* സംസ്ഥാനത്തെ എല്ലാ ആരോഗ്യ സ്ഥാപനങ്ങളിലും സമയബന്ധിതവും നിലവാരമുള്ളതുമായ ചികിത്സ ഉറപ്പാക്കുക.
* ആവശ്യമായ അളവിൽ ആന്റി-സ്നേക്ക് വെനം (ASV) മരുന്നുകളുടെ ലഭ്യത ഉറപ്പാക്കുക.
* ഡോക്ടർമാർ, നഴ്സുമാർ, ആരോഗ്യപ്രവർത്തകർ എന്നിവർക്ക് പ്രത്യേക പരിശീലനം നൽകുക.
* പൊതുജനങ്ങളിൽ പാമ്പുകടിയെക്കുറിച്ചുള്ള ശാസ്ത്രീയ അവബോധം വർധിപ്പിക്കുക.
* പാമ്പുകടി കേസുകളുടെ കൃത്യമായ റിപ്പോർട്ടിംഗും നിരീക്ഷണ സംവിധാനവും ശക്തിപ്പെടുത്തുക.
വിവിധ വകുപ്പുകളുടെ സംയുക്ത പ്രവർത്തനം
ആരോഗ്യ വകുപ്പിന്റെ നേതൃത്വത്തിൽ വനം വകുപ്പ്, തദ്ദേശ സ്വയംഭരണ സ്ഥാപനങ്ങൾ, വിദ്യാഭ്യാസ വകുപ്പ്, ദുരന്തനിവാരണ അതോറിറ്റി, മെഡിക്കൽ വിദ്യാഭ്യാസ വകുപ്പ്, വിവിധ ഗവേഷണ സ്ഥാപനങ്ങൾ എന്നിവയുടെ സഹകരണത്തോടെയാകും പദ്ധതി നടപ്പാക്കുക. പാമ്പുകടി കൂടുതലായി റിപ്പോർട്ട് ചെയ്യുന്ന മേഖലകളിൽ പ്രത്യേക ശ്രദ്ധ കേന്ദ്രീകരിച്ചുള്ള ഇടപെടലുകളും ഉണ്ടാകും.
ജനകീയ ബോധവൽക്കരണത്തിനും പ്രാധാന്യം
പാമ്പുകടിയേറ്റാൽ അന്ധവിശ്വാസ ചികിത്സകളിലേക്ക് പോകാതെ എത്രയും വേഗം അടുത്തുള്ള ആശുപത്രിയിലെത്തി ചികിത്സ തേടേണ്ടതിന്റെ ആവശ്യകതയെക്കുറിച്ച് വ്യാപക ബോധവൽക്കരണ പരിപാടികളും സംഘടിപ്പിക്കും. സ്കൂളുകൾ, കോളേജുകൾ, തൊഴിലിടങ്ങൾ, തദ്ദേശ സ്ഥാപനങ്ങൾ എന്നിവ കേന്ദ്രീകരിച്ചും അവബോധ പരിപാടികൾ നടത്തും.
ദേശീയതലത്തിൽ മാതൃകയാകാൻ കേരളം
പാമ്പുകടി പൊതുജനാരോഗ്യ പ്രശ്നമായി കണ്ട് അതിനെ സമഗ്രമായി നേരിടുന്നതിനുള്ള സംസ്ഥാനതല പ്രവർത്തനരേഖയ്ക്ക് അംഗീകാരം നൽകുന്ന കേരളത്തിന്റെ നടപടി രാജ്യത്തിനാകെ മാതൃകയാകുമെന്നാണ് ആരോഗ്യവകുപ്പ് വിലയിരുത്തുന്നത്. സമയബന്ധിത ചികിത്സ, ആരോഗ്യ സംവിധാനങ്ങളുടെ ശക്തിപ്പെടുത്തൽ, ശാസ്ത്രീയ ബോധവൽക്കരണം, വകുപ്പുകൾ തമ്മിലുള്ള ഏകോപനം എന്നിവയിലൂടെ 2030ഓടെ ‘പാമ്പുകടിമരണരഹിത കേരളം’ എന്ന ലക്ഷ്യം കൈവരിക്കാനാണ് സർക്കാർ ശ്രമിക്കുന്നത്.
