തിരുവനന്തപുരം: പാലക്കാട് റെയിൽവേ ഡിവിഷനിൽനിന്ന് മംഗളൂരു സ്റ്റേഷൻ ഉൾപ്പെടെയുള്ള പ്രദേശങ്ങൾ സൗത്ത് വെസ്റ്റേൺ റെയിൽവേയുടെ മൈസൂരു ഡിവിഷനിലേക്ക് മാറ്റാനുള്ള റെയിൽവേ ബോർഡിന്റെ തീരുമാനം പുനഃപരിശോധിക്കണമെന്ന് ആവശ്യപ്പെട്ട് മുഖ്യമന്ത്രി വി.ഡി. സതീശൻ പ്രധാനമന്ത്രി നരേന്ദ്ര മോദിക്ക് കത്തയച്ചു. കേരളത്തിന്റെ റെയിൽവേ അടിസ്ഥാന സൗകര്യ വികസനത്തെയും ഭാവിയിലെ വികസന സാധ്യതകളെയും പ്രതികൂലമായി ബാധിക്കുന്നതാണ് തീരുമാനമെന്ന് മുഖ്യമന്ത്രി കത്തിൽ ചൂണ്ടിക്കാട്ടി.
കേരള സർക്കാരുമായി യാതൊരു കൂടിയാലോചനയും നടത്താതെയാണ് ഇത്രയും സുപ്രധാനമായ തീരുമാനം റെയിൽവേ ബോർഡ് കൈക്കൊണ്ടതെന്നും മുഖ്യമന്ത്രി ആരോപിച്ചു. മംഗളൂരു ജങ്ഷൻ പോലുള്ള പ്രധാന സ്റ്റേഷൻ പാലക്കാട് ഡിവിഷനിൽനിന്ന് ഒഴിവാക്കുന്നത് ഡിവിഷന്റെ വരുമാനത്തിൽ ഗണ്യമായ കുറവുണ്ടാക്കുകയും ഭാവിയിലെ വികസന പ്രവർത്തനങ്ങളെ ബാധിക്കുകയും ചെയ്യുമെന്ന് അദ്ദേഹം വ്യക്തമാക്കി.
ഓഗസ്റ്റ് 20ന് റെയിൽവേ ബോർഡ് പുറത്തിറക്കിയ ഉത്തരവ് പ്രകാരം മംഗളൂരു മേഖലയെ മൈസൂരു ഡിവിഷനിലേക്ക് മാറ്റുന്ന നടപടി ഒക്ടോബർ ഒന്ന് മുതൽ പ്രാബല്യത്തിൽ വരും. ഇതോടെ മംഗളൂരു സ്റ്റേഷനു പുറമെ മംഗളൂരു തുറമുഖവുമായി ബന്ധപ്പെട്ട പ്രധാന സ്റ്റേഷനായ പനമ്പൂരും പുതിയ ഡിവിഷന്റെ പരിധിയിലാകും. പാലക്കാട് ഡിവിഷന് ഏകദേശം 1,100 കോടി രൂപയുടെ വാർഷിക വരുമാന നഷ്ടമുണ്ടാകുമെന്നാണ് റിപ്പോർട്ടുകൾ.
മംഗളൂരു മേഖലയിലെ മാറ്റം പാലക്കാട് ഡിവിഷനെ മാത്രമല്ല, കേരളത്തിന്റെ റെയിൽവേ വികസനത്തെയും ബാധിക്കുമെന്നാണ് സംസ്ഥാന സർക്കാരിന്റെ നിലപാട്. നിലവിൽ സതേൺ റെയിൽവേയുടെ ഭാഗമായ ഉള്ളാൾ മുതൽ മംഗളൂരു വരെയുള്ള പ്രദേശങ്ങൾ സൗത്ത് വെസ്റ്റേൺ റെയിൽവേയുടെ കീഴിലേക്ക് മാറുന്നതോടെ സതേൺ റെയിൽവേയ്ക്കും കേരളത്തിനും വലിയ നഷ്ടമുണ്ടാകുമെന്നും മുഖ്യമന്ത്രി ചൂണ്ടിക്കാട്ടി.
മംഗളൂരു മേഖലയിലെ മാറ്റം ട്രെയിൻ സർവീസുകളുടെ നടത്തിപ്പിലും ഭാവി വികസനത്തിലും പ്രത്യാഘാതമുണ്ടാക്കുമെന്ന ആശങ്കയും ഉയർന്നിട്ടുണ്ട്. ഉദാഹരണത്തിന്, കണ്ണൂരിൽ അവസാനിക്കുന്ന ട്രെയിനുകൾ മംഗളൂരുവിലേക്ക് നീട്ടുന്നതിനടക്കമുള്ള കാര്യങ്ങളിൽ ഇനി മൈസൂരു ഡിവിഷന്റെ അനുമതി ആവശ്യമായി വരുമെന്നാണ് റിപ്പോർട്ടുകൾ.
കേരളത്തെ അറിയിക്കാതെയും ജനപ്രതിനിധികളുമായി ചർച്ച നടത്താതെയും തീരുമാനമെടുത്തത് അംഗീകരിക്കാനാകില്ലെന്നാണ് സംസ്ഥാന സർക്കാരിന്റെ നിലപാട്. വിഷയത്തിൽ കേരളത്തിൽ നിന്നുള്ള ലോക്സഭാ, രാജ്യസഭാ എംപിമാരുടെ സഹകരണത്തോടെ കേന്ദ്ര സർക്കാരിന് മേൽ സമ്മർദം ശക്തമാക്കുമെന്നും നേരത്തെ മുഖ്യമന്ത്രി വ്യക്തമാക്കിയിരുന്നു.
പാലക്കാട് ഡിവിഷന്റെ ഭാവി വികസന സാധ്യതകൾ സംരക്ഷിക്കുന്നതിനും കേരളത്തിന്റെ റെയിൽവേ താൽപര്യങ്ങൾ ഉറപ്പാക്കുന്നതിനുമായി റെയിൽവേ ബോർഡിന്റെ തീരുമാനം അടിയന്തരമായി പുനഃപരിശോധിക്കണമെന്നാണ് പ്രധാനമന്ത്രിയോടുള്ള മുഖ്യമന്ത്രിയുടെ ആവശ്യം. വിഷയത്തിൽ കേന്ദ്രത്തിന്റെ ഇടപെടൽ ഉണ്ടാകുമെന്ന പ്രതീക്ഷയിലാണ് സംസ്ഥാന സർക്കാർ.
