അക്രമത്തെ അപലപിച്ച് ജനാധിപത്യ വിശ്വാസികള്‍
ദോഹ: കണ്ണൂർ ജില്ലയിലെ പയ്യന്നൂരിൽ കായിക മന്ത്രി ഒ.ജെ. ജനീഷിനെതിരെയുണ്ടായ ആക്രമണത്തിൽ ഖത്തർ ഇൻകാസ് കണ്ണൂർ ജില്ലാ കമ്മിറ്റി ശക്തമായ പ്രതിഷേധം രേഖപ്പെടുത്തി.
മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ പ്രതിഷേധിച്ചതിന്റെ പേരിൽ മന്ത്രിമാർക്ക് സഞ്ചാരസ്വാതന്ത്ര്യം പോലും തടയുന്ന ബി.ജെ.പിക്കും യുവമോർച്ചയ്ക്കും പിന്തുണ നൽകുന്ന സമീപനമാണ് ഡി.വൈ.എഫ്.ഐ സ്വീകരിക്കുന്നതെന്ന് ഖത്തർ ഇൻകാസ് കണ്ണൂർ ജില്ലാ കമ്മിറ്റി ആരോപിച്ചു. ബി.ജെ.പിക്കെതിരെ കോൺഗ്രസ് പ്രതിഷേധിക്കുമ്പോൾ സി.പി.എം നേതൃത്വത്തിന് അസ്വസ്ഥത ഉണ്ടാകുന്നതിന്റെ കാരണം വ്യക്തമാക്കണമെന്നും കമ്മിറ്റി ആവശ്യപ്പെട്ടു.
വിയോജിപ്പുകളെയും രാഷ്ട്രീയ നിലപാടുകളെയും കായികബലവും കല്ലേറും ഉപയോഗിച്ച് നേരിടുന്നത് ജനാധിപത്യവിരുദ്ധമായ സമീപനമാണെന്ന് കമ്മിറ്റി ചൂണ്ടിക്കാട്ടി. ആശയങ്ങളെ ആശയംകൊണ്ട് നേരിടാൻ കഴിയാത്തവരാണ് തെരുവിൽ അക്രമം അഴിച്ചുവിടുന്നതെന്നും നേതാക്കൾ ആരോപിച്ചു.
പയ്യന്നൂരിൽ മുൻകൂട്ടി ആസൂത്രണം ചെയ്ത് ആക്രമണം നടത്തിയ മുഴുവൻ പ്രതികളെയും അവർക്കു പിന്നിലെ ഗൂഢാലോചനയും അന്വേഷിച്ച് നിയമത്തിന് മുന്നിൽ കൊണ്ടുവരണമെന്ന് ഖത്തർ ഇൻകാസ് കണ്ണൂർ ജില്ലാ കമ്മിറ്റി ആവശ്യപ്പെട്ടു. ജനപ്രതിനിധികൾക്കെതിരായ ഇത്തരം ആക്രമണങ്ങൾക്കെതിരെ ജനാധിപത്യ വിശ്വാസികൾ ശക്തമായി പ്രതികരിക്കണമെന്നും കമ്മിറ്റി ആവശ്യപ്പെട്ടു.
മന്ത്രിമാർക്കെതിരായ കടന്നുകയറ്റങ്ങൾക്കെതിരെ ശക്തമായ നിയമനടപടി സ്വീകരിക്കണമെന്ന് ഖത്തർ ഇൻകാസ് കണ്ണൂർ ജില്ലാ കമ്മിറ്റി പ്രസിഡന്റ് ഷമീർ മട്ടന്നൂർ ആവശ്യപ്പെട്ടു.