വഖഫ് (ഭേദഗതി) നിയമത്തിനെതിരെ വിവിധ സംസ്ഥാനങ്ങളിൽ നിയമപരമായ കേസുകളും പ്രതിഷേധങ്ങളും തുടരുന്നതിനിടെയാണ് മധ്യപ്രദേശ് സർക്കാരിന്റെ പുതിയ നടപടി
രാജ്യത്ത് ആദ്യമായി വഖഫ് ബോർഡിൽ ഹിന്ദു സമുദായത്തിൽ നിന്നുള്ള അംഗങ്ങളെ ഉൾപ്പെടുത്തി മധ്യപ്രദേശ് സർക്കാർ വഖഫ് ബോർഡ് പുനഃസംഘടിപ്പിച്ചു. വഖഫ് (ഭേദഗതി) നിയമം, 2025 പ്രാബല്യത്തിൽ വന്നതിന് പിന്നാലെയാണ് പുതിയ ബോർഡിന് രൂപം നൽകിയത്. ഈ നിയമപ്രകാരം മുസ്ലിം ഇതര അംഗങ്ങളെ വഖഫ് ബോർഡിൽ ഉൾപ്പെടുത്താൻ സംസ്ഥാനങ്ങൾക്ക് അവസരമുണ്ട്.
മധ്യപ്രദേശ് സർക്കാർ രൂപീകരിച്ച 11 അംഗ ബോർഡിൽ രണ്ട് ഹിന്ദു അംഗങ്ങളാണ് ഉൾപ്പെട്ടിരിക്കുന്നത്. കൂടാതെ ഒരു വനിതാ അംഗത്തെയും ബോർഡിൽ ഉൾപ്പെടുത്തിയിട്ടുണ്ട്. പുതിയ നിയമത്തിന്റെ വ്യവസ്ഥകൾ നടപ്പാക്കുന്ന രാജ്യത്തെ ആദ്യ സംസ്ഥാനമെന്ന നിലയിലും മധ്യപ്രദേശ് ശ്രദ്ധ നേടുകയാണ്.വഖഫ് സ്വത്തുക്കളുടെ ഭരണവും സംരക്ഷണവും കൂടുതൽ സുതാര്യമാക്കുകയും കാര്യക്ഷമമാക്കുകയും ചെയ്യുകയെന്ന ലക്ഷ്യത്തോടെയാണ് നിയമഭേദഗതിയെന്ന് കേന്ദ്ര സർക്കാർ വ്യക്തമാക്കിയിരുന്നു. അതേസമയം, മുസ്ലിം ഇതര അംഗങ്ങളെ ഉൾപ്പെടുത്തുന്നതിനെതിരെ വിവിധ മുസ്ലിം സംഘടനകളും പ്രതിപക്ഷ പാർട്ടികളും ശക്തമായ പ്രതിഷേധം ഉയർത്തിയിട്ടുണ്ട്. മതപരമായ സ്ഥാപനങ്ങളുടെ സ്വയംഭരണത്തിൽ ഇടപെടലാണിതെന്നാണ് അവരുടെ വിമർശനം.
വഖഫ് (ഭേദഗതി) നിയമത്തിനെതിരെ വിവിധ സംസ്ഥാനങ്ങളിൽ നിയമപരമായ വെല്ലുവിളികളും പ്രതിഷേധങ്ങളും തുടരുന്നതിനിടെയാണ് മധ്യപ്രദേശ് പുതിയ ബോർഡ് നിലവിൽ കൊണ്ടുവന്നത്. ഈ നടപടി രാജ്യവ്യാപകമായി രാഷ്ട്രീയ-നിയമപരമായ ചർച്ചകൾക്ക് വീണ്ടും വഴിവെച്ചിരിക്കുകയാണ്.
