ദോഹ: വേനൽ അവധിക്കാല യാത്രകൾക്ക് ശേഷം ആയിരക്കണക്കിന് കുടുംബങ്ങളും വിദ്യാർഥികളും ദോഹയിൽ തിരിച്ചെത്തുന്ന സാഹചര്യത്തിൽ യാത്രക്കാർക്കായി പ്രത്യേക മാർഗനിർദ്ദേശങ്ങൾ പുറത്തിറക്കി ഹമദ് അന്താരാഷ്ട്ര വിമാനത്താവളം (HIA).
ഓഗസ്റ്റിലെ തിരക്ക് കണക്കിലെടുത്ത് യാത്രക്കാർ മുൻകൂട്ടി തയ്യാറെടുക്കണമെന്നും വിമാനത്താവളത്തിലെ ലഭ്യമായ സൗകര്യങ്ങൾ പരമാവധി പ്രയോജനപ്പെടുത്തണമെന്നും അധികൃതർ അറിയിച്ചു.
കുട്ടികളുമായി എത്തുന്ന കുടുംബങ്ങൾക്ക് ടെർമിനലിന്റെ വിവിധ ഭാഗങ്ങളിൽ സൗജന്യ ബേബി സ്ട്രോളറുകൾ ലഭ്യമാണ്. കൂടാതെ ഡി, ഇ കോൺകോർസുകളിലെ നിർദിഷ്ട സ്റ്റേഷനുകളിൽ നിന്ന് സൗജന്യ ഷട്ടിൽ ബഗ്ഗി സർവീസും ഉപയോഗിക്കാം. സീറ്റുകൾ ലഭ്യമാണെങ്കിൽ യാത്രാമധ്യേയും ബഗ്ഗിയിൽ കയറാം. അറൈവൽസ് ഇമിഗ്രേഷൻ എസ്കലേറ്ററുകൾക്ക് സമീപം യാത്രക്കാരെ എത്തിക്കുന്ന രീതിയിലാണ് സർവീസ് ക്രമീകരിച്ചിരിക്കുന്നത്.
അർഹരായ യാത്രക്കാർക്ക് Scan & Go ഇ-ഗേറ്റുകളും ഉപയോഗിക്കാം. എന്നാൽ കുട്ടികൾക്ക് ഈ സൗകര്യം ഉപയോഗിക്കാൻ കുറഞ്ഞത് 120 സെന്റിമീറ്റർ ഉയരം ഉണ്ടായിരിക്കണം.
യാത്രക്കാരെ സ്വീകരിക്കാനെത്തുന്നവർക്കും നിർദേശം
വിമാനത്താവളത്തിലെത്തുന്ന ബന്ധുക്കളെയും സുഹൃത്തുക്കളെയും സ്വീകരിക്കാനെത്തുന്നവർ എയർപോർട്ട് കാർ പാർക്ക് ഉപയോഗിക്കണമെന്ന് അധികൃതർ നിർദേശിച്ചു. അറൈവൽസ് ഹാളിൽ നിന്ന് ചെറിയ ദൂരത്തിൽ നടന്ന് എത്താവുന്ന സ്ഥലത്താണ് കാർ പാർക്ക്.
Uber, BadrGo, Ryde വാഹനങ്ങളുടെ പിക്കപ്പ് പോയിന്റുകൾ കാർ പാർക്കിന്റെ ഗ്രൗണ്ട് ഫ്ലോറിൽ, കാർ റെന്റൽ കൗണ്ടറുകൾക്ക് സമീപമാണ് ക്രമീകരിച്ചിരിക്കുന്നത്.
അംഗീകൃത ടാക്സികളും ബസുകളും അറൈവൽസ് ഹാളിന് ചുറ്റുമുള്ള നിർദിഷ്ട പവിലിയനുകളിൽ നിന്ന് ലഭിക്കും. ദോഹ മെട്രോ സ്റ്റേഷനിലേക്കും ടെർമിനലിൽ നിന്ന് ചെറിയ ദൂരം ഇൻഡോർ ആയി നടന്ന് എത്താം. കാർ റെന്റൽ, ലിമോസിൻ, വാലറ്റ് പാർക്കിങ് സേവനങ്ങളും യാത്രക്കാർക്ക് ഉപയോഗപ്പെടുത്താം.
ബാഗേജ് എടുക്കുമ്പോൾ ശ്രദ്ധിക്കണം
വിമാനത്തിൽ നിന്ന് ഇറങ്ങിയ ശേഷം ബാഗേജ് റിക്ലെയിം ഏരിയയിലെ സ്ക്രീനുകളിൽ പരിശോധിച്ച് അനുവദിച്ചിരിക്കുന്ന ബാഗേജ് ബെൽറ്റ് ഏതാണെന്ന് ഉറപ്പാക്കണം. വലുപ്പം കൂടിയ ബാഗേജുകളും പ്രത്യേക ബെൽറ്റിലൂടെ എത്തുന്നതിനാൽ അതും സ്ക്രീനിൽ പരിശോധിക്കണം.
ബാഗേജ് കൈപ്പറ്റിയ ശേഷം വിമാനടിക്കറ്റിലോ ബാഗേജ് ടാഗിലോ നൽകിയ വിവരങ്ങളുമായി ടാഗ് പരിശോധിച്ചശേഷം മാത്രമേ അറൈവൽസ് ഏരിയയിൽ നിന്ന് പുറത്തേക്ക് പോകാവൂ.
ബാഗേജ് ലഭിക്കാതിരിക്കുകയോ കണ്ടെത്താനാകാതിരിക്കുകയോ ചെയ്താൽ അറൈവൽസ് ഹാളിലെ Baggage Services Office വഴി സഹായം തേടാം.
തിരക്കേറിയ ഈ കാലയളവിൽ യാത്രക്കാരെ സഹായിക്കുന്നതിനായി ഹമദ് അന്താരാഷ്ട്ര വിമാനത്താവളത്തിലെ ജീവനക്കാർ വിവിധ ഭാഗങ്ങളിൽ സജീവമായി സേവനത്തിനുണ്ടാകുമെന്നും അധികൃതർ അറിയിച്ചു. മുൻകൂട്ടി യാത്രാ വിവരങ്ങൾ പരിശോധിക്കുകയും വിമാനത്താവളത്തിലെ നിർദേശങ്ങൾ പാലിക്കുകയും ചെയ്യുന്നത് തിരക്ക് ഒഴിവാക്കി സുഗമമായ വരവ് ഉറപ്പാക്കാൻ സഹായിക്കുമെന്നും അധികൃതർ വ്യക്തമാക്കി.
