ന്യൂഡൽഹി: ബിജെപിയുടെ ദേശീയ വക്താവ് സ്ഥാനവും പാർട്ടിയുടെ പ്രാഥമിക അംഗത്വവും രാജിവെച്ചതിന് പിന്നിലെ കാരണം വ്യക്തമാക്കി ഷെഹ്സാദ് പൂനാവാല. സാമ്പത്തിക പ്രതിസന്ധിയും വ്യക്തിപരമായ സാഹചര്യങ്ങളുമാണ് പാർട്ടി വിടാൻ കാരണമെന്ന് അദ്ദേഹം പറഞ്ഞു. രാഷ്ട്രീയ പ്രവർത്തനത്തിന് പാർട്ടിയിൽ നിന്ന് ശമ്പളം ലഭിക്കാത്തതിനാൽ ജീവിതച്ചെലവുകൾ മുന്നോട്ടുകൊണ്ടുപോകാൻ ബുദ്ധിമുട്ടിയെന്നും വാടക നൽകാൻ പോലും സാമ്പത്തിക പ്രയാസം നേരിട്ടെന്നും പൂനാവാല വ്യക്തമാക്കി.
‘എനിക്ക് വാടക നൽകണം. ബിജെപിയിൽ പ്രവർത്തിക്കുന്നയാളാണെന്ന കാരണത്താൽ വീട്ടുടമ സൗജന്യമായി താമസിക്കാൻ അനുവദിക്കില്ല. എല്ലാ മാസവും ഒന്നാം തീയതി വാടക നൽകണം. രാഷ്ട്രീയ പാർട്ടികൾ പ്രവർത്തകർക്ക് ശമ്പളം നൽകുന്നില്ല’ എന്നായിരുന്നു പൂനാവാലയുടെ പ്രതികരണം. വർഷങ്ങളായി രാഷ്ട്രീയത്തിൽ മുഴുവൻ സമയവും പ്രവർത്തിച്ചതിനാൽ മറ്റൊരു വരുമാനമാർഗം കണ്ടെത്താൻ സാധിച്ചില്ലെന്നും അദ്ദേഹം പറഞ്ഞു.
ബിജെപിയിലെ തന്റെ ചുമതല 24 മണിക്കൂറും, വർഷത്തിൽ 365 ദിവസവും പ്രവർത്തിക്കേണ്ടതായിരുന്നുവെന്നും പൂനാവാല പറഞ്ഞു. നേരത്തെ ഉണ്ടായിരുന്ന സമ്പാദ്യം ഉപയോഗിച്ചാണ് ഇതുവരെ ജീവിതച്ചെലവുകൾ മുന്നോട്ടുകൊണ്ടുപോയത്. എന്നാൽ ഇപ്പോഴത്തെ സാഹചര്യത്തിൽ കുടുംബത്തിന്റെ സാമ്പത്തിക ബാധ്യതകൾ നിറവേറ്റാൻ സ്ഥിരമായ വരുമാനം ആവശ്യമായി വന്നതോടെയാണ് രാഷ്ട്രീയത്തിൽ നിന്ന് മാറിനിൽക്കാൻ തീരുമാനിച്ചതെന്നും അദ്ദേഹം വ്യക്തമാക്കി.
രാജി പെട്ടെന്നെടുത്ത തീരുമാനമല്ലെന്നും പൂനാവാല പറഞ്ഞു. 2024 മുതൽ തന്നെ രാഷ്ട്രീയത്തിൽ നിന്ന് മാറുന്നതിനെക്കുറിച്ച് ആലോചിച്ചിരുന്നുവെന്നും അടുത്തിടെ രാജി സംബന്ധിച്ച് പാർട്ടി നേതൃത്വത്തെ അറിയിച്ചിരുന്നുവെന്നും അദ്ദേഹം വ്യക്തമാക്കി. രാജി സംബന്ധിച്ച് ബിജെപി നേതൃത്വം തന്നെ ബന്ധപ്പെട്ടിരുന്നുവെന്നും എന്നാൽ ഒടുവിൽ വ്യക്തിപരമായ സാഹചര്യങ്ങൾ പരിഗണിച്ച് തീരുമാനത്തിൽ ഉറച്ചുനിൽക്കുകയായിരുന്നുവെന്നും പൂനാവാല പറഞ്ഞു.
രാഷ്ട്രീയ പാരമ്പര്യമുള്ള കുടുംബത്തിൽ നിന്നല്ല താൻ വരുന്നതെന്നും അതിനാൽ രാഷ്ട്രീയത്തിൽ നിന്ന് ലഭിക്കുന്ന ഏതെങ്കിലും ആനുകൂല്യങ്ങളെ ആശ്രയിച്ചല്ല ജീവിതം മുന്നോട്ടുകൊണ്ടുപോകുന്നതെന്നും പൂനാവാല വ്യക്തമാക്കി. ‘ഞാൻ ആരുടെയും മകനെന്ന രാഷ്ട്രീയ പാരമ്പര്യത്തിലൂടെയല്ല വന്നത്. രാഷ്ട്രീയത്തിൽ പ്രവർത്തിക്കുന്നതിനൊപ്പം കുടുംബത്തിന്റെ സാമ്പത്തിക ഉത്തരവാദിത്തങ്ങളും നിറവേറ്റേണ്ടതുണ്ട്’ എന്ന നിലപാടാണ് അദ്ദേഹം പങ്കുവെച്ചത്.
അതേസമയം, ബിജെപി വിട്ടെങ്കിലും പ്രധാനമന്ത്രി നരേന്ദ്ര മോദിയോടും ബിജെപിയുടെ ആശയങ്ങളോടുമുള്ള തന്റെ പിന്തുണയിൽ മാറ്റമില്ലെന്നും പൂനാവാല വ്യക്തമാക്കി. ബിജെപിയിൽ പ്രവർത്തിച്ച കാലയളവിൽ പാർട്ടിയുടെ ആശയത്തിലും നേതൃത്വത്തിലും തനിക്ക് വിശ്വാസമുണ്ടായിരുന്നുവെന്നും അത് ഇപ്പോഴും തുടരുകയാണെന്നും അദ്ദേഹം പറഞ്ഞു.
രാഷ്ട്രീയം വിട്ടശേഷം സ്വകാര്യ മേഖലയിലേക്ക് മടങ്ങാനാണ് പൂനാവാലയുടെ തീരുമാനം. രാഷ്ട്രീയത്തിന് മുമ്പ് കോർപറേറ്റ് മേഖലയിലും മാധ്യമരംഗത്തും പ്രവർത്തിച്ചിരുന്ന അദ്ദേഹം ഇനി സ്ഥിരമായ വരുമാനമുള്ള തൊഴിൽ മേഖല തിരഞ്ഞെടുക്കാനാണ് ഉദ്ദേശിക്കുന്നത്. സാമ്പത്തിക ബാധ്യതകൾ പരിഹരിക്കുന്നതിനൊപ്പം കുടുംബത്തിന് കൂടുതൽ സമയം നൽകാനും പുതിയ ജീവിതക്രമം സഹായിക്കുമെന്നാണ് അദ്ദേഹത്തിന്റെ വിലയിരുത്തൽ.
കോൺഗ്രസിലേക്ക് തിരിച്ചുപോകുമെന്ന അഭ്യൂഹങ്ങളും ഇതിനിടെ ശക്തമായിരുന്നു. എന്നാൽ നിലവിലെ കോൺഗ്രസ് നേതൃത്വത്തെക്കുറിച്ച് കടുത്ത നിലപാടാണ് പൂനാവാല സ്വീകരിച്ചത്. ബിജെപി വിട്ടെങ്കിലും ഉടൻ മറ്റൊരു രാഷ്ട്രീയ പാർട്ടിയിൽ ചേരാനുള്ള തീരുമാനം എടുത്തിട്ടില്ലെന്നാണ് അദ്ദേഹത്തിന്റെ പ്രതികരണങ്ങളിൽ നിന്ന് വ്യക്തമാകുന്നത്.
ടെലിവിഷൻ ചർച്ചകളിൽ ബിജെപിയുടെ ശക്തമായ പ്രതിരോധമുഖമായി ശ്രദ്ധ നേടിയ നേതാവായിരുന്നു ഷെഹ്സാദ് പൂനാവാല. 2017ൽ കോൺഗ്രസ് നേതൃത്വത്തിനെതിരെ പരസ്യമായി രംഗത്തെത്തിയതിന് പിന്നാലെയാണ് ദേശീയ രാഷ്ട്രീയത്തിൽ ശ്രദ്ധ നേടിയത്. പിന്നീട് ബിജെപിയിൽ ചേർന്ന അദ്ദേഹം പാർട്ടിയുടെ ദേശീയ വക്താക്കളിൽ പ്രമുഖനായി മാറുകയായിരുന്നു. ഇപ്പോൾ സാമ്പത്തിക പ്രതിസന്ധിയും വ്യക്തിപരമായ സാഹചര്യങ്ങളും ചൂണ്ടിക്കാട്ടി പാർട്ടിയിൽ നിന്ന് പിന്മാറിയതോടെ അദ്ദേഹത്തിന്റെ രാഷ്ട്രീയ ഭാവിയും ദേശീയ രാഷ്ട്രീയത്തിൽ ചർച്ചയാകുകയാണ്.
