കൊച്ചിയിലെ ഒരു ട്രാവൽ ഏജൻസി വഴി പോയതാണ് സംഘം
നേപ്പാളിലെ പ്രളയ ദുരന്തത്തിനിടെ 36 അംഗ മലയാളി സംഘം സുരക്ഷിതരാണെന്ന വിവരം ആശ്വാസമാകുന്നു. സംഘം പ്രളയബാധിത മേഖലയിൽനിന്ന് അകലെയാണെന്നും സുരക്ഷിതരാണെന്നും അധികൃതരെ ഉദ്ധരിച്ച് റിപ്പോർട്ടുകൾ വ്യക്തമാക്കുന്നു.
അതേസമയം, മലയാളികൾ ആരെങ്കിലും കാണാതായതായി ഇതുവരെ സ്ഥിരീകരിച്ച റിപ്പോർട്ടുകളില്ല. എന്നാൽ ആശയവിനിമയ സംവിധാനങ്ങൾ തകരാറിലായതിനാൽ നേപ്പാളിൽ കുടുങ്ങിയ ഇന്ത്യക്കാരുടെ കൃത്യമായ വിവരങ്ങൾ ശേഖരിക്കുന്നതിനുള്ള ശ്രമങ്ങൾ തുടരുകയാണ്.
നേപ്പാളിലെ റാസുവ ജില്ലയിലുണ്ടായ മിന്നൽപ്രളയത്തിൽ 133 ഇന്ത്യക്കാരും 37 പ്രവാസി ഇന്ത്യക്കാരും ഉൾപ്പെടെ നിരവധി പേരെ കണ്ടെത്താനാകാത്തതായി റിപ്പോർട്ടുകളുണ്ട്. കൈലാസ്–മാനസസരോവർ തീർഥാടകരാണ് കാണാതായ ഇന്ത്യക്കാരിൽ വലിയൊരു വിഭാഗം. ഇന്ത്യൻ എംബസിയും നേപ്പാൾ അധികൃതരും സംയുക്തമായി രക്ഷാപ്രവർത്തനവും വിവരശേഖരണവും തുടരുകയാണ്.
