തെരെച്ചിൽ ഊർജ്ജിതം, കാണാതായവരിൽ 500 ഓളം പേർ ഇന്ത്യക്കാരാണെന്നും അവരുമായി ബന്ധപ്പെടാൻ കഴിയുന്നില്ലെന്നും നേപ്പാൾ അധികൃതർ ഔദ്യോഗീക വാർത്താ കുറിപ്പിൽ പറയുന്നു
കാഠ്മണ്ഡു: നേപ്പാൾ–ചൈന അതിർത്തി മേഖലയിൽ ബുധനാഴ്ചയുണ്ടായ അതിശക്തമായ മിന്നൽപ്രളയത്തിലും മണ്ണിടിച്ചിലിലും മരണസംഖ്യ 165 ആയി ഉയർന്നു. റാസുവ ജില്ലയിൽ മാത്രം 165 മൃതദേഹങ്ങൾ കണ്ടെത്തിയതായി നേപ്പാൾ അധികൃതരെ ഉദ്ധരിച്ച് റിപ്പോർട്ടുകൾ പറയുന്നു. 826 പേരെ ഇപ്പോഴും കാണാനില്ലെന്നാണ് ഏറ്റവും പുതിയ കണക്ക്. രക്ഷാപ്രവർത്തനം പുരോഗമിക്കുന്നതിനാൽ മരണസംഖ്യ ഇനിയും ഉയരാൻ സാധ്യതയുണ്ട്.
നേപ്പാളിലെ റാസുവ, ധാദിങ് മേഖലകളിലും ചൈനയുടെ ടിബറ്റിലെ ഗ്യിറോങ് മേഖലയിലുമാണ് പ്രളയം കനത്ത നാശം വിതച്ചത്. ഭോട്ടെ കോശി നദിയിൽ അപ്രതീക്ഷിതമായി വൻതോതിൽ ജലവും മണ്ണും പാറകളും ഒഴുകിയെത്തുകയായിരുന്നു. വീടുകൾ, പാലങ്ങൾ, റോഡുകൾ, വാഹനങ്ങൾ, വൈദ്യുതി പദ്ധതികൾ എന്നിവ വ്യാപകമായി തകർന്നു.
ഹിമാനിയിൽ നിന്നുണ്ടായ വൻ മഞ്ഞ്–പാറ ഇടിച്ചിൽ നദിയുടെ ഒഴുക്ക് തടസ്സപ്പെടുത്തിയതിനെ തുടർന്നാണ് ദുരന്തമുണ്ടായതെന്നാണ് പ്രാഥമിക വിലയിരുത്തൽ. ആദ്യം ഭൂചലനമാണ് കാരണമെന്ന സംശയമുണ്ടായിരുന്നെങ്കിലും പിന്നീട് ലഭിച്ച ഉപഗ്രഹചിത്രങ്ങളും വിദഗ്ധ പരിശോധനകളും ഹിമാനി തകർച്ചയിലേക്കാണ് വിരൽചൂണ്ടുന്നത്.
പ്രളയബാധിത മേഖലയിൽ നിരവധി വിദേശ സഞ്ചാരികളും തീർഥാടകരും കുടുങ്ങിയിട്ടുണ്ട്. നേപ്പാൾ ടൂറിസം ബോർഡിന്റെ കണക്കുകൾ പ്രകാരം 403 സഞ്ചാരികളെ കാണാതായിട്ടുണ്ട്; ഇതിൽ 341 പേർ വിദേശികളാണ്. ഇന്ത്യക്കാർ ഉൾപ്പെടെയുള്ള കൈലാസ്–മാനസസരോവർ തീർഥാടകരും കാണാതായവരിലുണ്ട്.
റാസുവ മേഖലയിലെ പ്രധാന റോഡുകളും പാലങ്ങളും തകർന്നതോടെ പല പ്രദേശങ്ങളും ഒറ്റപ്പെട്ടിരിക്കുകയാണ്. വൈദ്യുതി ഉൽപ്പാദന-വിതരണ സംവിധാനങ്ങൾക്കും വലിയ നാശനഷ്ടമുണ്ടായി. മോശം കാലാവസ്ഥ രക്ഷാപ്രവർത്തനത്തിന് തടസ്സമാകുന്നുണ്ടെങ്കിലും നേപ്പാൾ സൈന്യവും പൊലീസും ഹെലികോപ്റ്ററുകളും ഉപയോഗിച്ച് തിരച്ചിലും രക്ഷാപ്രവർത്തനവും ശക്തമാക്കിയിട്ടുണ്ട്.
അതിനിടെ നദിയിൽ അവശിഷ്ടങ്ങൾ അടിഞ്ഞുകൂടി പുതിയ തടസ്സങ്ങൾ രൂപപ്പെട്ടതിനാൽ വീണ്ടും പ്രളയമുണ്ടാകാനുള്ള സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകി. നദീതീര പ്രദേശങ്ങളിൽ താമസിക്കുന്നവർക്ക് ജാഗ്രത പാലിക്കാനും സുരക്ഷിത സ്ഥാനങ്ങളിലേക്ക് മാറാനും നിർദേശം നൽകിയിട്ടുണ്ട്.
ഇന്ത്യ ഉൾപ്പെടെയുള്ള രാജ്യങ്ങൾ രക്ഷാപ്രവർത്തനത്തിനും ദുരിതാശ്വാസത്തിനും സഹായം നൽകുന്നുണ്ട്. ദുരന്തത്തിന്റെ യഥാർഥ നാശനഷ്ടം വിലയിരുത്തുന്നതിനുള്ള നടപടികളും തുടരുകയാണ്. വാർത്താ വിനിമയ സംവിധാനങ്ങളും ഗതാഗത ബന്ധങ്ങളും തകർന്നതിനാൽ കാണാതായവരുടെ കൃത്യമായ എണ്ണം കണ്ടെത്തുന്നതിനും അധികൃതർക്ക് വെല്ലുവിളി തുടരുകയാണ്.
