ഇന്‍കാസ് അഡ്വൈസറി ബോർഡ് മുൻ ചെയർമാൻ
കാലത്തിന്റെ ഒഴുക്കിൽ ചില സംഘടനകൾ വെറും കൂട്ടായ്മയായി മാത്രം നിലനിൽക്കാറില്ല. അവ മനുഷ്യരുടെ ജീവിതാനുഭവങ്ങളുടെ ഭാഗമായി മാറുകയും പ്രതീക്ഷകളുടെ വിലാസമാവുകയും സമൂഹത്തിന്റെ സ്പന്ദനങ്ങളെ ഏറ്റുവാങ്ങുന്ന ജീവനുള്ള പ്രസ്ഥാനങ്ങളായി വളരുകയും ചെയ്യുന്നു. ഖത്തറിലെ ഇന്ത്യൻ പ്രവാസി സമൂഹത്തിന്റെ ഹൃദയസ്പന്ദനമായി മാറിയ ഇൻകാസ് അത്തരമൊരു സംഘടനയാണ്. അതിന്റെ കാൽനൂറ്റാണ്ട് പൂർത്തിയാകുമ്പോൾ, ഒരു സംഘടനയുടെ വാർഷികം ആഘോഷിക്കുന്നതിലുപരി, സേവനത്തിന്റെയും സൗഹൃദത്തിന്റെയും സാമൂഹിക പ്രതിബദ്ധതയുടെയും സമർപ്പണത്തിന്റെയും ചരിത്രമാണ് നാം ഓർമ്മിക്കുന്നത്.
ഇരുപത്തഞ്ച് വർഷങ്ങൾക്ക് മുമ്പ് ഒരു ചെറിയ കൂട്ടായ്മയുടെ സ്വപ്നമായി ആരംഭിച്ച ഇൻകാസ്, ഇന്ന് ഖത്തറിലെ ഏറ്റവും ശ്രദ്ധേയമായ സാമൂഹിക-സാംസ്കാരിക സംഘടനകളിലൊന്നായി വളർന്നിരിക്കുന്നു. പ്രവാസികളുടെ പ്രശ്നങ്ങൾ സ്വന്തം പ്രശ്നങ്ങളായി ഏറ്റെടുക്കാനും അവരുടെ പ്രതീക്ഷകൾക്ക് കരുത്തേകാനും പൊതുതാൽപ്പര്യമുള്ള വിഷയങ്ങളിൽ സജീവമായി ഇടപെടാനും സംഘടന തുടക്കം മുതൽ തന്നെ മുന്നിലുണ്ടായിരുന്നു. മനുഷ്യരുടെ സന്തോഷങ്ങളിലും ദുരിതങ്ങളിലും ഒരുപോലെ പങ്കാളിയായ ആ ജനകീയ ഇടപെടലുകളാണ് ഇൻകാസിന് പ്രവാസി സമൂഹത്തിനിടയിലും സ്വദേശി സമൂഹത്തിനിടയിലും വിശിഷ്ടമായ അംഗീകാരം നേടിക്കൊടുത്തത്.
ഖത്തറിന്റെ സാമൂഹിക ജീവിതത്തിന്റെ ഭാഗമായി മാറിയ നിരവധി ആഘോഷങ്ങളിലും കായികമേളകളിലും കലാ-സാംസ്കാരിക പരിപാടികളിലും ദേശീയ ദിനാചരണങ്ങളിലുമെല്ലാം ഇൻകാസ് സജീവ സാന്നിധ്യമായിരുന്നു. വൈവിധ്യങ്ങളാൽ സമ്പന്നമായ ഒരു സമൂഹത്തിനിടയിൽ സൗഹൃദത്തിന്റെയും സഹവർത്തിത്വത്തിന്റെയും സന്ദേശം പ്രചരിപ്പിക്കാനും ഇന്ത്യൻ പ്രവാസി സമൂഹത്തിന്റെ സാംസ്കാരിക വ്യക്തിത്വം മനോഹരമായി അടയാളപ്പെടുത്താനും സംഘടനയ്ക്ക് സാധിച്ചു.
എന്നാൽ ഇൻകാസിന്റെ മഹത്വം ആഘോഷവേദികളിലെ സാന്നിധ്യത്തിൽ മാത്രം ഒതുങ്ങുന്നില്ല. പ്രതിസന്ധിയുടെ നിമിഷങ്ങളിൽ മനുഷ്യർക്കൊപ്പം നിൽക്കുന്ന കരുതലിന്റെ മറ്റൊരു പേരാണ് ഇൻകാസ്. ഒരാൾക്ക് സഹായം ആവശ്യമുള്ളപ്പോൾ കൈത്താങ്ങായി മാറാനും, ഒറ്റപ്പെടുന്നവരെ ചേർത്തുപിടിക്കാനും, ദുരിതമനുഭവിക്കുന്ന കുടുംബങ്ങൾക്ക് ആശ്വാസമാകാനും സംഘടന എല്ലായ്പ്പോഴും മുന്നിലുണ്ടായിരുന്നു. അതുകൊണ്ടുതന്നെ ഇൻകാസ് നിരവധി പ്രവാസികളുടെ മനസ്സിൽ ഒരു പ്രസ്ഥാനത്തേക്കാൾ ഏറെ, ഒരു കുടുംബമായി മാറി.
ഈ ചരിത്രപരമായ വളർച്ചയ്ക്ക് പിന്നിൽ അനേകം മനുഷ്യരുടെ നിസ്വാർത്ഥ സമർപ്പണമുണ്ട്. വിവിധ കാലഘട്ടങ്ങളിൽ സംഘടനയെ നയിച്ച നേതാക്കളുടെയും അർപ്പണബോധത്തോടെ പ്രവർത്തിച്ച പ്രവർത്തകരുടെയും ത്യാഗവും കഠിനാധ്വാനവും ചേർന്നാണ് ഇൻകാസ് ഇന്നത്തെ ഉയരത്തിലെത്തിയത്. നേതൃത്വം മാറിയെങ്കിലും ലക്ഷ്യങ്ങൾ മാറിയില്ല. മുഖങ്ങൾ മാറിയെങ്കിലും സംഘടനയുടെ ആത്മാവ് നിലനിന്നു. പദവികളേക്കാൾ സമൂഹസേവനത്തിന് പ്രാധാന്യം നൽകിയ തലമുറകളുടെ വിയർപ്പും സമയവും സ്നേഹവും ചേർന്നാണ് ഈ പ്രസ്ഥാനം പടുത്തുയർത്തപ്പെട്ടത്.
പ്രത്യേകിച്ച് കോവിഡ് മഹാമാരിയുടെ കാലഘട്ടം ഇൻകാസിന്റെ സാമൂഹിക പ്രതിബദ്ധതയെ ചരിത്രത്തിൽ സ്വർണലിപികളാൽ രേഖപ്പെടുത്തിയ അധ്യായമാണ്. ലോകം മുഴുവൻ അനിശ്ചിതത്വത്തിന്റെയും ഭീതിയുടെയും നിഴലിൽ നിൽക്കുമ്പോൾ ഇൻകാസ് സേവനത്തിന്റെ വെളിച്ചമായി മാറി. ദുരിതത്തിലായ പ്രവാസികൾക്ക് ഭക്ഷണവും മരുന്നും അവശ്യസഹായങ്ങളും എത്തിക്കുന്നതിൽ സംഘടന അസാമാന്യമായ പങ്കുവഹിച്ചു.
നാട്ടിലേക്ക് മടങ്ങാൻ കഴിയാതെ വലയുന്നവരുടെ കണ്ണീരൊപ്പാനും അവരുടെ മടക്കയാത്ര യാഥാർത്ഥ്യമാക്കാനും ഇൻകാസ് നടത്തിയ പരിശ്രമങ്ങൾ ഇന്നും അനേകരുടെ നന്ദിനിറഞ്ഞ ഓർമ്മകളാണ്. അന്ന് പ്രവാസികളുടെ മടക്കയാത്രയ്ക്കായി പത്ത് ചാർട്ടേഡ് വിമാനങ്ങൾ ഒരുക്കി എന്നത് സംഘടനയുടെ ചരിത്രത്തിലെ ഏറ്റവും വലിയ മനുഷ്യസ്നേഹ ഇടപെടലുകളിൽ ഒന്നായിരുന്നു. അതിൽ അവസാനത്തേതും ഏറെ ശ്രദ്ധേയവുമായ വിമാനം ഇൻകാസ് കണ്ണൂർ ജില്ലാ കമ്മിറ്റിയുടെ നേതൃത്വത്തിൽ ഒരുക്കപ്പെട്ടത് പ്രത്യേക അഭിമാനമായി നിലനിൽക്കുന്നു. പ്രതിസന്ധിയുടെ നടുവിൽ സ്വന്തം നാടിന്റെ മക്കളെ ചേർത്തുപിടിച്ച ആ ദൗത്യം, ഇൻകാസിന്റെ സേവനചരിത്രത്തിലെ ഉജ്ജ്വലമായ മാതൃകയായി എന്നെന്നും വാഴ്ത്തപ്പെടും.
ഈ സന്ദർഭത്തിൽ, ഇൻകാസിന്റെ വളർച്ചയ്ക്കും ഉയർച്ചയ്ക്കും കരുത്തേകിയ എല്ലാ മുൻകാല നേതാക്കളെയും പ്രവർത്തകരെയും, ഇന്നത്തെ നേതൃത്വത്തെയും അർപ്പണബോധത്തോടെ പ്രവർത്തിക്കുന്ന ഓരോ സഹയാത്രികനെയും ഹൃദയം നിറഞ്ഞ നന്ദിയോടെ ആദരിക്കട്ടെ.
കാലത്തിന്റെ വഴിയരികിൽ നിന്ന് നിശ്ശബ്ദമായി യാത്രമൊഴിഞ്ഞ നേതാക്കളുടെയും പ്രവർത്തകരുടെയും ഓർമകൾക്ക് മുന്നിൽ ശ്രദ്ധാഞ്ജലിഅർപ്പിക്കുന്നു. ഇന്നും ഈ പ്രസ്ഥാനത്തിന്റെ ആത്മാവും കരുത്തുമായി നിലകൊള്ളുന്ന ഓരോ പ്രവർത്തകനും ഈ കാൽനൂറ്റാണ്ടിന്റെ വിജയഗാഥയിലെ തുല്യ അവകാശികളാണ്. ഇരുപത്തഞ്ച് വർഷങ്ങൾ ഒരു നാഴികക്കല്ല് മാത്രമല്ല. അത് ഒരു പാരമ്പര്യത്തിന്റെ പ്രകാശമാണ്. ഒരു തലമുറയുടെ സ്വപ്നങ്ങൾക്കും സമർപ്പണങ്ങൾക്കും സാക്ഷിയായ ചരിത്രമാണ്. അനേകം മനുഷ്യരുടെ സ്നേഹവും സേവനവും ചേർന്ന് രചിച്ച ഒരു ജനകീയ പ്രസ്ഥാനത്തിന്റെ കാവ്യമാണ്.
ഇൻകാസ് ഒരു സംഘടനയുടെ പേര് മാത്രമല്ല; ജീവിതയാത്രയിൽ ഹൃദയത്തോട് ഏറ്റവും ചേർന്നു നിൽക്കുന്ന അനുഭവങ്ങളുടെ പേരാണ്. അത് ഒരു പ്രസ്ഥാനംമാത്രമല്ല, അനേകം മനുഷ്യരുടെ പ്രതീക്ഷകളുടെയും വിശ്വാസങ്ങളുടെയും കണ്ണുനീരിന്റെയും പുഞ്ചിരികളുടെയും ജീവിക്കുന്ന ചരിത്രമാണ്. അതുകൊണ്ടുതന്നെ, ഇൻകാസിനെകുറിച്ച് എഴുതുമ്പോൾ എന്റെ പേനയിൽ മഷിയല്ല ഒഴുകുന്നത്, ജീവരക്തം പകർന്ന് വരമൊഴികളാകുകയാണ്.
ഇരുപത്തഞ്ച് വർഷം എന്നത് ഒരു കാലയളവ് മാത്രമല്ല. അത് ഒരു പാരമ്പര്യമാണ്. ഒരു തലമുറയുടെ സ്വപ്നങ്ങൾക്കും സേവനത്തിനും ത്യാഗങ്ങൾക്കും സാക്ഷിയായ ചരിത്രമാണ്. അതോടൊപ്പം പുതിയ സ്വപ്നങ്ങളിലേക്കും പുതിയ വെല്ലുവിളികളിലേക്കും പുതിയ ഉത്തരവാദിത്തങ്ങളിലേക്കുമുള്ള ചുവടുവെപ്പാണ്.
വരുന്ന കാലങ്ങളിലും സേവനത്തിന്റെയും സൗഹൃദത്തിന്റെയും സഹവർത്തിത്വത്തിന്റെയും മൂല്യങ്ങൾ ഉയർത്തിപ്പിടിച്ച് കൂടുതൽ ജനകീയവും ശക്തവുമായ ഇടപെടലുകളുമായി ഇൻകാസ് മുന്നേറട്ടെ. പ്രവാസികളുടെ ശബ്ദമായും അവരുടെ പ്രതീക്ഷകളുടെ പ്രതീകമായും പ്രയാസകാലങ്ങളിലെ കരുതലായും ഈ പ്രസ്ഥാനം എന്നും നിലനിൽക്കട്ടെ.