കിഫ്ബിയുടെ പ്രവർത്തനങ്ങളിൽ സാമ്പത്തിക ക്രമക്കേടുകളും ഗുരുതര വീഴ്ചകളും ചൂണ്ടിക്കാട്ടി സുധ പിള്ള കമ്മിറ്റി റിപ്പോർട്ട്. കടമെടുപ്പ് അവസാനിപ്പിക്കാനും സി.എ.ജി. ഓഡിറ്റിനും ശുപാർശ
തിരുവനന്തപുരം: കേരള ഇൻഫ്രാസ്ട്രക്ചർ ഇൻവെസ്റ്റ്‌മെന്റ് ഫണ്ട് ബോർഡിന്റെ (കിഫ്ബി) പ്രവർത്തനങ്ങൾ സമഗ്രമായി വിലയിരുത്താൻ യു.ഡി.എഫ്. സർക്കാർ നിയോഗിച്ച സുധ പിള്ള അധ്യക്ഷയായ വിദഗ്ധ സമിതിയുടെ റിപ്പോർട്ട് നിയമസഭയുടെ മേശപ്പുറത്തുവെച്ചു. കിഫ്ബിയുടെ സാമ്പത്തിക ഇടപാടുകൾ, കടമെടുപ്പ്, പദ്ധതികളുടെ നടത്തിപ്പ്, ഭരണസംവിധാനം എന്നിവയിൽ ഗുരുതരമായ വീഴ്ചകളും ക്രമക്കേടുകളും ഉണ്ടായതായി റിപ്പോർട്ട് ചൂണ്ടിക്കാട്ടുന്നു.
കിഫ്ബി നിലവിലെ രീതിയിൽ തുടരേണ്ടതില്ലെന്നും പൊതുവിപണിയിൽനിന്നുള്ള കടമെടുപ്പ് അവസാനിപ്പിക്കണമെന്നും സമിതി ശുപാർശ ചെയ്തിട്ടുണ്ട്. കിഫ്ബി വഴി നടപ്പാക്കുന്ന പദ്ധതികൾ സംസ്ഥാനത്തിന് വലിയ സാമ്പത്തിക ബാധ്യതയുണ്ടാക്കിയെന്നാണ് റിപ്പോർട്ടിലെ പ്രധാന നിരീക്ഷണം. കിഫ്ബിയുടെ പത്തുവർഷത്തെ പ്രവർത്തനങ്ങൾ കംപ്ട്രോളർ ആൻഡ് ഓഡിറ്റർ ജനറലിന്റെ (സി.എ.ജി.) നേതൃത്വത്തിൽ സമഗ്ര പെർഫോമൻസ് ഓഡിറ്റിന് വിധേയമാക്കണമെന്നും സമിതി നിർദേശിക്കുന്നു.
കിഫ്ബി വഴി നടപ്പാക്കിയ പദ്ധതികൾ നേരിട്ട് സർക്കാർ ഏറ്റെടുത്ത് നടപ്പാക്കിയിരുന്നെങ്കിൽ സംസ്ഥാനത്തിന് 13,103.64 കോടി രൂപയുടെ അധിക സാമ്പത്തിക നേട്ടമുണ്ടാകുമായിരുന്നുവെന്നാണ് സമിതിയുടെ കണക്കുകൂട്ടൽ. കിഫ്ബിയുടെ സാമ്പത്തിക മാതൃക സംസ്ഥാനത്തിന്റെ കടമെടുപ്പ് പരിധിയെയും ബാധിച്ചിട്ടുണ്ടെന്നും റിപ്പോർട്ട് വിലയിരുത്തുന്നു. കിഫ്ബിയുടെ കടമെടുപ്പ് സംസ്ഥാനത്തിന്റെ ബാധ്യതയല്ലെന്ന നിലപാടിനുപകരം, അതിന്റെ സാമ്പത്തിക പ്രത്യാഘാതങ്ങൾ സംസ്ഥാനത്തിന്റെ ധനകാര്യവുമായി ബന്ധപ്പെടുത്തി പരിശോധിക്കണമെന്ന സമീപനമാണ് സമിതി സ്വീകരിച്ചിരിക്കുന്നത്.
വരുമാനം ലഭിക്കുന്ന പദ്ധതികൾക്കായി കിഫ്ബി പരിമിതമായ തുക മാത്രമാണ് വിനിയോഗിച്ചതെന്നും സമിതി ചൂണ്ടിക്കാട്ടുന്നു. ഉയർന്ന പലിശനിരക്കിൽ വായ്പയെടുത്ത് തിരിച്ചടവിന് മതിയായ വരുമാനസ്രോതസ്സുകളില്ലാത്ത പദ്ധതികൾ നടപ്പാക്കിയതും സാമ്പത്തിക ആസൂത്രണത്തിലെ പോരായ്മകളിലൊന്നായി റിപ്പോർട്ട് വിലയിരുത്തുന്നു. കിഫ്ബിയുടെ വായ്പാ തിരിച്ചടവിനും പലിശയ്ക്കുമായി സംസ്ഥാനത്തിന്റെ വരുമാനത്തിൽനിന്ന് വലിയൊരു വിഹിതം ചെലവഴിക്കേണ്ടിവരുന്ന സാഹചര്യവും റിപ്പോർട്ടിൽ വിശദീകരിക്കുന്നുണ്ട്.
നിലവിൽ കിഫ്ബി മുഖേന ആരംഭിച്ച പദ്ധതികൾ ബന്ധപ്പെട്ട സർക്കാർ വകുപ്പുകൾ ഏറ്റെടുത്ത് മുൻഗണനാക്രമത്തിൽ പൂർത്തിയാക്കണമെന്നും സമിതി നിർദേശിക്കുന്നു. കിഫ്ബിയുടെ പ്രവർത്തനരീതി പുനഃസംഘടിപ്പിക്കുക, സാമ്പത്തിക നിയന്ത്രണം ശക്തമാക്കുക, ജീവനക്കാരുടെ വിന്യാസവും ശമ്പള-ആനുകൂല്യങ്ങളും പുനഃപരിശോധിക്കുക തുടങ്ങിയ നിർദേശങ്ങളും റിപ്പോർട്ടിലുണ്ട്.
കിഫ്ബിയുടെ പ്രവർത്തനങ്ങൾ സംസ്ഥാന സർക്കാരിന്റെയും ധനവകുപ്പിന്റെയും ഫലപ്രദമായ നിയന്ത്രണത്തിന് പുറത്തായിരുന്നുവെന്ന വിമർശനവും റിപ്പോർട്ടിൽ ഉയരുന്നുണ്ട്. ഭൂമിയേറ്റെടുക്കൽ ഉൾപ്പെടെയുള്ള നടപടികളിൽ കൂടുതൽ പരിശോധന ആവശ്യമാണെന്നും സമിതി അഭിപ്രായപ്പെടുന്നു.
അതേസമയം, കിഫ്ബിയുടെ പ്രവർത്തനങ്ങളെക്കുറിച്ചുള്ള വിലയിരുത്തൽ രാഷ്ട്രീയ വിവാദത്തിനും വഴിവെച്ചിട്ടുണ്ട്. കിഫ്ബി വഴി സംസ്ഥാനത്ത് നടപ്പാക്കിയ അടിസ്ഥാനസൗകര്യ വികസന പദ്ധതികളുടെ നേട്ടങ്ങൾ അവഗണിക്കരുതെന്നാണ് ഇടതുപക്ഷത്തിന്റെ നിലപാട്. റിപ്പോർട്ടിലെ ശുപാർശകൾ നടപ്പാക്കുന്നതിലൂടെ നിലവിലുള്ളതും പുരോഗമിച്ചുകൊണ്ടിരിക്കുന്നതുമായ പദ്ധതികളെ എങ്ങനെ ബാധിക്കുമെന്നതും നിർണായകമാണ്.
റിപ്പോർട്ടിലെ കണ്ടെത്തലുകളും ശുപാർശകളും പരിശോധിച്ചശേഷം തുടർനടപടികൾ സ്വീകരിക്കാനാണ് സർക്കാർ നീക്കം. കിഫ്ബിയുടെ ഭാവി പ്രവർത്തനരീതി, നിലവിലുള്ള വായ്പകളുടെ തിരിച്ചടവ്, പൂർത്തിയാകാത്ത പദ്ധതികളുടെ നടത്തിപ്പ് എന്നിവയിൽ സർക്കാർ സ്വീകരിക്കുന്ന തീരുമാനം സംസ്ഥാനത്തിന്റെ അടിസ്ഥാനസൗകര്യ വികസനത്തിലും ധനകാര്യ മാനേജ്മെന്റിലും നിർണായകമാകും.