കൊച്ചി: ഇടുക്കി മലയോര മേഖലയിലും മൂവാറ്റുപുഴ മേഖലകളിലും തുടരുന്ന കനത്ത മഴയെ തുടർന്ന് മൂവാറ്റുപുഴയാറിലും തൊടുപുഴയാറിലും ജലനിരപ്പ് അപകടനില കടന്നു. നദികളിലെ ജലനിരപ്പ് ക്രമാതീതമായി ഉയരുന്ന സാഹചര്യത്തിൽ തീരപ്രദേശങ്ങളിലുള്ളവർ അതീവ ജാഗ്രത പാലിക്കണമെന്ന് റവന്യൂ, ദുരന്തനിവാരണ അധികൃതർ മുന്നറിയിപ്പ് നൽകി.
കേന്ദ്ര കാലാവസ്ഥ വകുപ്പ് എറണാകുളം ജില്ലയിൽ ഓറഞ്ച് അലർട്ട് പ്രഖ്യാപിച്ചതിനെ തുടർന്ന് ജില്ലയിലെ വിവിധ ഭാഗങ്ങളിൽ ശക്തമായ മഴ തുടരുകയാണ്. മഴയുടെ തീവ്രതയും നദികളിലെ ജലനിരപ്പ് ഉയരുന്നതും കണക്കിലെടുത്ത് ജില്ലാ ഭരണകൂടം അടിയന്തര മുൻകരുതൽ നടപടികൾ ശക്തമാക്കിയിട്ടുണ്ട്.
സുരക്ഷാ മുൻകരുതലിന്റെ ഭാഗമായി ജില്ലാ ടൂറിസം പ്രമോഷൻ കൗൺസിലിന്റെ (DTPC) നിയന്ത്രണത്തിലുള്ള എല്ലാ വിനോദസഞ്ചാര കേന്ദ്രങ്ങളും താത്കാലികമായി അടച്ചതായി അധികൃതർ അറിയിച്ചു. മഴയും ശക്തമായ ഒഴുക്കും തുടരുന്നതിനാൽ ജലാശയങ്ങൾ, പുഴകൾ, വെള്ളച്ചാട്ടങ്ങൾ എന്നിവിടങ്ങളിലേക്കുള്ള സന്ദർശനം ഒഴിവാക്കണമെന്നും അധികൃതർ അഭ്യർഥിച്ചു.
അതേസമയം, നഗരത്തിലെ നിരവധി താഴ്ന്ന പ്രദേശങ്ങളിൽ വെള്ളം കയറിയതോടെ ജനജീവിതം ഭാഗികമായി താറുമാറായി. ചില പ്രദേശങ്ങളിൽ വീടുകളിലേക്കും വ്യാപാര സ്ഥാപനങ്ങളിലേക്കും വെള്ളം കയറിയതായി റിപ്പോർട്ടുകളുണ്ട്. ദുരന്തസാധ്യതയുള്ള മേഖലകളിൽ റവന്യൂ ഉദ്യോഗസ്ഥരും ഫയർഫോഴ്സും പോലീസും നിരീക്ഷണം ശക്തമാക്കിയിട്ടുണ്ട്.
നദീതീരങ്ങളിൽ താമസിക്കുന്നവരും വെള്ളപ്പൊക്ക ഭീഷണിയുള്ള പ്രദേശങ്ങളിലുള്ളവരും അധികൃതരുടെ നിർദേശങ്ങൾ കർശനമായി പാലിക്കണമെന്നും ആവശ്യമായാൽ സുരക്ഷിത സ്ഥലങ്ങളിലേക്ക് മാറാൻ തയ്യാറായിരിക്കണമെന്നും ജില്ലാ ഭരണകൂടം അറിയിച്ചു. രാത്രിയിലും മഴ ശക്തമാകാൻ സാധ്യതയുള്ളതിനാൽ അനാവശ്യ യാത്രകൾ ഒഴിവാക്കണമെന്നും മുന്നറിയിപ്പുണ്ട്.
കാലാവസ്ഥാ വകുപ്പിന്റെ ഏറ്റവും പുതിയ മുന്നറിയിപ്പ് പ്രകാരം വരും മണിക്കൂറുകളിലും ജില്ലയിൽ ശക്തമായതോ അതിശക്തമായതോ ആയ മഴ തുടരാൻ സാധ്യതയുണ്ട്. ഇതോടെ ഉരുൾപൊട്ടൽ സാധ്യതയുള്ള മലയോര മേഖലകളിലും നദീതീരങ്ങളിലും പ്രത്യേക ജാഗ്രത തുടരുകയാണ്. സ്ഥിതിഗതികൾ വിലയിരുത്തി ആവശ്യമായ സാഹചര്യത്തിൽ ദുരിതാശ്വാസ ക്യാമ്പുകൾ തുറക്കാനും അടിയന്തര രക്ഷാപ്രവർത്തനങ്ങൾ കൂടുതൽ വിപുലീകരിക്കാനും ജില്ലാ ഭരണകൂടം സജ്ജമാണെന്ന് അധികൃതർ അറിയിച്ചു.
