തിരുവനന്തപുരം: സംസ്ഥാനത്തിന്റെ പേര് ഔദ്യോഗികമായി ‘കേരളം’ എന്നാക്കി മാറ്റണമെന്ന ദീർഘകാല ആവശ്യം യാഥാർഥ്യമാക്കുന്നതിനായുള്ള നിർണായക നടപടിക്ക് കേരള നിയമസഭ ഏകകണ്ഠമായി അംഗീകാരം നൽകി. പേരുമാറ്റത്തിനായി കേന്ദ്ര ആഭ്യന്തര മന്ത്രാലയം തയ്യാറാക്കിയ ‘കേരള (പേരു മാറ്റൽ) ബിൽ’ (Kerala (Alteration of Name) Bill) കരടിനാണ് സഭയുടെ അംഗീകാരം ലഭിച്ചത്.
നിയമസഭയിൽ ബിൽ പരിഗണിച്ചപ്പോൾ ഭരണ-പ്രതിപക്ഷ ഭേദമന്യേ എല്ലാ അംഗങ്ങളും പിന്തുണ അറിയിച്ചതോടെയാണ് കരട് ഏകകണ്ഠമായി പാസായത്. ഇതോടെ സംസ്ഥാനത്തിന്റെ പേര് ഭരണഘടനയിലും കേന്ദ്ര നിയമങ്ങളിലും ഔദ്യോഗികമായി ‘കേരളം’ എന്നാക്കി മാറ്റുന്നതിനുള്ള നടപടികൾക്ക് കൂടുതൽ വേഗം ലഭിക്കുമെന്നാണ് പ്രതീക്ഷ.ബിൽ പാസാക്കിയതിന് പിന്നാലെ സ്പീക്കർ തിരുവഞ്ചൂർ രാധാകൃഷ്ണൻ നിയമസഭയിൽ നടത്തിയ പരാമർശം ശ്രദ്ധേയമായി. കേരള നിയമസഭയുടെ ചരിത്രത്തിൽ ആദ്യമായാണ് സംസ്ഥാനത്തിന്റെ പേര് മാറ്റുന്നതിനുള്ള കേന്ദ്ര ബില്ലിന്റെ കരട് സഭ പരിഗണിച്ച് അംഗീകരിക്കുന്നതെന്ന് അദ്ദേഹം വ്യക്തമാക്കി.
സംസ്ഥാനത്തിന്റെ പേര് ഇംഗ്ലീഷിൽ നിലവിലുള്ള “Kerala” എന്നതിൽ നിന്ന് ഭരണഘടനയുടെ വിവിധ വകുപ്പുകളിലും കേന്ദ്ര നിയമങ്ങളിലുമെല്ലാം “Keralam” എന്നാക്കി മാറ്റണമെന്ന ആവശ്യം സംസ്ഥാന സർക്കാർ നേരത്തെ തന്നെ കേന്ദ്രത്തിന് മുന്നിൽ ഉന്നയിച്ചിരുന്നു. ഇതിന്റെ തുടർച്ചയായാണ് കേന്ദ്ര ആഭ്യന്തര മന്ത്രാലയം ബില്ലിന്റെ കരട് തയ്യാറാക്കി സംസ്ഥാന നിയമസഭയുടെ അഭിപ്രായം തേടിയത്.മലയാള ഭാഷയിലും സംസ്ഥാനത്തിന്റെ സാംസ്കാരിക-ചരിത്രപരമായ വ്യക്തിത്വത്തിനും കൂടുതൽ യോജിച്ച പേരാണ് ‘കേരളം’ എന്ന നിലപാടാണ് സംസ്ഥാന സർക്കാർ ആവർത്തിച്ച് വ്യക്തമാക്കിയിട്ടുള്ളത്. ഇതിനുമുമ്പും പേരുമാറ്റവുമായി ബന്ധപ്പെട്ട പ്രമേയങ്ങൾ നിയമസഭ പാസാക്കി കേന്ദ്രത്തിന് അയച്ചിരുന്നുവെങ്കിലും, ഇപ്പോൾ കേന്ദ്രം തയ്യാറാക്കിയ ബിൽ കരടിന് നിയമസഭയുടെ അംഗീകാരം ലഭിച്ചതോടെ നടപടിക്രമം നിർണായക ഘട്ടത്തിലേക്ക് കടന്നിരിക്കുകയാണ്.നിയമസഭയുടെ ശുപാർശ കേന്ദ്ര സർക്കാരിന് കൈമാറും. തുടർന്ന് പാർലമെന്റിൽ ബിൽ അവതരിപ്പിച്ച് പാസാക്കുകയും, രാഷ്ട്രപതിയുടെ അംഗീകാരം ലഭിക്കുകയും ചെയ്താൽ സംസ്ഥാനത്തിന്റെ ഔദ്യോഗിക പേര് ‘കേരളം’ എന്നാകും.
