ന്യൂഡൽഹി: കോക്രോച്ച് ജനതാ പാർട്ടി (സിജെപി) നേതൃത്വത്തിൽ പാർലമെന്റിലേക്ക് സംഘടിപ്പിച്ച ‘സൻസദ് ചലോ’ മാർച്ചിനിടെ ഡൽഹിയിൽ വീണ്ടും സംഘർഷാവസ്ഥ. ജന്തർ മന്തറിൽ നിന്ന് പാർലമെന്റിലേക്ക് പ്രതിഷേധ മാർച്ച് നടത്താൻ ശ്രമിച്ച പ്രവർത്തകരെ ഡൽഹി പൊലീസ് തടഞ്ഞതോടെയാണ് സ്ഥിതിഗതികൾ വഷളായത്.
പാർലമെന്റിലേക്കുള്ള വിവിധ പ്രവേശന കവാടങ്ങളിൽ കനത്ത സുരക്ഷയാണ് പൊലീസ് ഒരുക്കിയത്. ബാരിക്കേഡുകൾ സ്ഥാപിച്ച പൊലീസ്, പ്രതിഷേധക്കാർ മുന്നേറുന്നത് തടയാൻ ശ്രമിച്ചു. ഇതോടെ പ്രതിഷേധക്കാരും പൊലീസും തമ്മിൽ ഉന്തുംതള്ളും ഉണ്ടായി. ചിലർ ബാരിക്കേഡുകൾ മറികടക്കാൻ ശ്രമിച്ചതോടെ പൊലീസ് ഇടപെട്ട് നിരവധി പ്രതിഷേധക്കാരെ കസ്റ്റഡിയിലെടുത്തു.
സംഘർഷത്തിനിടെ സിജെപി ദേശീയ കൺവീനർ അഭിജീത് ദീപ്കെയെയും ഡൽഹി പൊലീസ് കസ്റ്റഡിയിലെടുത്തതായി റിപ്പോർട്ടുകളുണ്ട്. അദ്ദേഹത്തെ പൊലീസ് വാഹനത്തിൽ കയറ്റിക്കൊണ്ടുപോകുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
വിദ്യാഭ്യാസ മേഖലയിലെ ക്രമക്കേടുകൾ, പ്രവേശന പരീക്ഷകളിലെ അഴിമതി, തൊഴിലില്ലായ്മ, കേന്ദ്ര സർക്കാരിന്റെ നയങ്ങൾ എന്നിവ ചൂണ്ടിക്കാട്ടിയാണ് സിജെപി പ്രതിഷേധം സംഘടിപ്പിച്ചിരിക്കുന്നത്. വിവിധ സംസ്ഥാനങ്ങളിൽ നിന്നെത്തിയ വിദ്യാർഥികളും യുവജനങ്ങളും മാർച്ചിൽ പങ്കെടുത്തു.
സംഭവത്തെ തുടർന്ന് ജന്തർ മന്തർ, പാർലമെന്റ് സ്ട്രീറ്റ്, വിജയ് ചൗക്ക് എന്നിവിടങ്ങളിൽ സുരക്ഷ കൂടുതൽ ശക്തമാക്കി. ഗതാഗതത്തിലും നിയന്ത്രണങ്ങൾ ഏർപ്പെടുത്തിയിട്ടുണ്ട്. സ്ഥിതിഗതികൾ നിരീക്ഷിച്ചുവരുകയാണെന്നും നിയമം കൈയിലെടുക്കാൻ ശ്രമിക്കുന്നവർക്കെതിരെ നടപടിയുണ്ടാകുമെന്നും ഡൽഹി പൊലീസ് അറിയിച്ചു.
അതേസമയം, പ്രതിഷേധം സമാധാനപരമായിരുന്നുവെന്നും നേതാക്കളെയും പ്രവർത്തകരെയും അനാവശ്യമായി കസ്റ്റഡിയിലെടുത്തുവെന്നുമാണ് സിജെപി നേതൃത്വത്തിന്റെ ആരോപണം. പ്രതിഷേധം തുടരുമെന്നും ആവശ്യങ്ങൾ അംഗീകരിക്കുന്നതുവരെ സമരം അവസാനിപ്പിക്കില്ലെന്നും നേതാക്കൾ വ്യക്തമാക്കി.
