വയനാട്ടിലെ കള്ളാടി മേഖലയിൽ ഉണ്ടായ മണ്ണിടിച്ചിൽ ദുരന്തത്തിന്റെ പശ്ചാത്തലത്തിൽ ദുരന്തനിവാരണ പ്രവർത്തനങ്ങൾക്ക് മുൻഗണന നൽകണമെന്നും വിവാദങ്ങൾക്കുള്ള സമയമല്ല ഇതെന്നും മുൻ റവന്യൂ മന്ത്രി കെ. രാജൻ പറഞ്ഞു.
ദുരന്തബാധിത പ്രദേശം സന്ദർശിച്ച ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം. അപകടത്തിൽ കാണാതായവരെ കണ്ടെത്തുന്നതിനായി എല്ലാ സംവിധാനങ്ങളെയും ഏകോപിപ്പിച്ച് തെരച്ചിൽ ശക്തമായി തുടരേണ്ടതുണ്ടെന്ന് അദ്ദേഹം ആവശ്യപ്പെട്ടു. ജീവൻ രക്ഷിക്കാനും ദുരന്തബാധിതർക്ക് ആവശ്യമായ സഹായങ്ങൾ സമയബന്ധിതമായി എത്തിക്കാനുമാണ് ഇപ്പോൾ മുഴുവൻ ശ്രദ്ധ കേന്ദ്രീകരിക്കേണ്ടതെന്നും അദ്ദേഹം പറഞ്ഞു.
ദുരന്തവുമായി ബന്ധപ്പെട്ട് വിവിധ തരത്തിലുള്ള ആരോപണങ്ങളും രാഷ്ട്രീയ വിവാദങ്ങളും ഉയരുന്ന സാഹചര്യത്തിൽ, ഇത്തരം ചർച്ചകൾ രക്ഷാപ്രവർത്തനങ്ങളെ ബാധിക്കരുതെന്ന് കെ. രാജൻ അഭിപ്രായപ്പെട്ടു. കാണാതായവരെ കണ്ടെത്തുകയും ദുരിതബാധിത കുടുംബങ്ങൾക്ക് പരമാവധി പിന്തുണ ഉറപ്പാക്കുകയും ചെയ്യുക എന്നതാണ് ഇപ്പോഴത്തെ പ്രധാന ഉത്തരവാദിത്തമെന്നും അദ്ദേഹം കൂട്ടിച്ചേർത്തു.സംസ്ഥാന സർക്കാർ, ദുരന്തനിവാരണ സേന, അഗ്നിരക്ഷാസേന, പൊലീസ്, സന്നദ്ധ പ്രവർത്തകർ എന്നിവരുടെ നേതൃത്വത്തിൽ രക്ഷാപ്രവർത്തനങ്ങൾ തുടരുകയാണെന്നും, കാണാതായവരെ കണ്ടെത്താനുള്ള ശ്രമങ്ങൾ അവസാനിപ്പിക്കില്ലെന്നും അദ്ദേഹം വ്യക്തമാക്കി.
