മൂന്ന് പതിറ്റാണ്ടിലേറെയായി രാജ്യത്തിന്റെ വിവിധ ഭാഗങ്ങളിൽ അതിവിദഗ്ധമായി തട്ടിപ്പുകൾ നടത്തി പൊലീസിനെ വെട്ടിച്ച് നടന്നിരുന്ന ‘ഹൈടെക്’ തട്ടിപ്പുകാരൻ ബിംഗ്സൺ ജോൺ ഒടുവിൽ പിടിയിലായി. വ്യാജ രേഖകൾ, വ്യാജ തിരിച്ചറിയൽ കാർഡുകൾ, കള്ള വിലാസങ്ങൾ എന്നിവ ഉപയോഗിച്ച് രാജ്യത്തെ വിവിധ നഗരങ്ങളിലെ 300-ലധികം പഞ്ചനക്ഷത്ര ഹോട്ടലുകളിൽ താമസിച്ച ഇയാൾ നിരവധി ആളുകളെയും സ്ഥാപനങ്ങളെയും ലക്ഷ്യമിട്ട് സാമ്പത്തിക തട്ടിപ്പുകൾ നടത്തിയെന്നാണ് അന്വേഷണ സംഘത്തിന്റെ കണ്ടെത്തൽ.
സമ്പന്ന വ്യവസായിയുടെയോ ഉന്നത ഉദ്യോഗസ്ഥന്റെയോ വേഷത്തിൽ എത്തി ആഡംബര ജീവിതശൈലി പ്രദർശിപ്പിച്ചാണ് ബിംഗ്സൺ വിശ്വാസം നേടിയിരുന്നത്. തുടർന്ന് വ്യാജ വാഗ്ദാനങ്ങൾ നൽകി പണം കൈപ്പറ്റുകയോ വിലപിടിപ്പുള്ള സാധനങ്ങൾ തട്ടിയെടുക്കുകയോ ചെയ്യുന്നതായിരുന്നു ഇയാളുടെ പതിവ് രീതി.വിവിധ സംസ്ഥാനങ്ങളിലെ പൊലീസ് രജിസ്റ്റർ ചെയ്ത കേസുകളിൽ പ്രതിയായ ബിംഗ്സൺ ജോൺ ഏറെക്കാലമായി ഒളിവിലായിരുന്നു. സാങ്കേതിക തെളിവുകൾ, ബാങ്ക് ഇടപാടുകൾ, മൊബൈൽ ഫോൺ വിവരങ്ങൾ, സിസിടിവി ദൃശ്യങ്ങൾ എന്നിവയുടെ അടിസ്ഥാനത്തിൽ നടത്തിയ ദീർഘനാളത്തെ അന്വേഷണത്തിനൊടുവിലാണ് ഇയാളെ അറസ്റ്റ് ചെയ്യാൻ കഴിഞ്ഞത്.
ഇയാൾക്കെതിരെ രാജ്യത്തിന്റെ വിവിധ ഭാഗങ്ങളിൽ നിരവധി തട്ടിപ്പ് കേസുകൾ നിലവിലുണ്ടെന്നും കൂടുതൽ വിവരങ്ങൾ ശേഖരിച്ച് അന്വേഷണം വ്യാപിപ്പിക്കുകയാണെന്നും അന്വേഷണ ഉദ്യോഗസ്ഥർ അറിയിച്ചു. ബിംഗ്സൺ ജോണിന്റെ അറസ്റ്റോടെ വർഷങ്ങളായി നീണ്ടുനിന്ന നിരവധി കേസുകൾക്ക് നിർണായക വഴിത്തിരിവാകുമെന്ന പ്രതീക്ഷയിലാണ് അന്വേഷണസംഘം.
