ആർട്ടിഫിഷ്യൽ ഇന്റലിജൻസ് (എഐ) രംഗത്തെ നിക്ഷേപം ശക്തമാക്കാൻ ചൈനീസ് ടെക് ഭീമനായ അലി ബാബ പുതിയ ഓഹരികൾ പുറത്തിറക്കുന്നു. എഐ വികസനത്തിനും അടിസ്ഥാന സൗകര്യങ്ങൾ വിപുലീകരിക്കുന്നതിനുമായി ഹോങ്കോങ് ഓഹരി വിപണിയിലൂടെ 80 ബില്യൺ ഹോങ്കോങ് ഡോളർ (ഏകദേശം 10.2 ബില്യൺ യുഎസ് ഡോളർ) സമാഹരിക്കാനാണ് കമ്പനിയുടെ പദ്ധതി.
ഹാങ്ഷൗ ആസ്ഥാനമായ അലി ബാബ ഇതിനകം എഐ മേഖലയിലേക്ക് വൻതോതിൽ നിക്ഷേപം നടത്തുന്നുണ്ട്. എഐ മോഡലുകൾ, ക്ലൗഡ് കംപ്യൂട്ടിങ്, ചിപ്പുകൾ, ഡാറ്റാ സെന്ററുകൾ എന്നിവയുടെ വികസനത്തിനാണ് പ്രധാനമായും ചെലവഴിക്കുന്നത്. പുതിയ ഓഹരി വിൽപ്പനയിലൂടെ ലഭിക്കുന്ന മുഴുവൻ തുകയും കമ്പനിയുടെ ‘ഫുൾ-സ്റ്റാക്ക് എഐ’ ശേഷി വികസിപ്പിക്കാൻ വിനിയോഗിക്കുമെന്ന് അലി ബാബ അറിയിച്ചു.
710 മില്യൺ പുതിയ ഓഹരികൾ
710 മില്യൺ പുതിയ സാധാരണ ഓഹരികളാണ് അലി ബാബ ഹോങ്കോങ് വിപണിയിൽ വിൽക്കുന്നത്. ഒരു ഓഹരിക്ക് 112.70 ഹോങ്കോങ് ഡോളറാണ് വില നിശ്ചയിച്ചിരിക്കുന്നത്. മുൻ വ്യാപാരദിനത്തിലെ ക്ലോസിങ് വിലയേക്കാൾ ഏകദേശം 3.6 ശതമാനം കുറവാണിത്. അമേരിക്കയ്ക്ക് പുറത്തുള്ള നിക്ഷേപകരെ ലക്ഷ്യമിട്ടുള്ള പ്ലേസ്മെന്റാണ് നടത്തുന്നത്. ഇടപാട് ഓഗസ്റ്റ് 26ന് പൂർത്തിയാകുമെന്നാണ് പ്രതീക്ഷ.
ഇടപാട് പൂർത്തിയായാൽ ഹോങ്കോങ് ലിസ്റ്റഡ് കമ്പനിയുടെ ചരിത്രത്തിലെ ഏറ്റവും വലിയ പ്രൈമറി ഫോളോ-ഓൺ ഓഹരി വിൽപ്പനയായി ഇത് മാറും. 2026ലെ ആഗോള പ്രൈമറി ഓഹരി വിൽപ്പനകളിൽ മൂന്നാം സ്ഥാനത്തും ഇടപാട് എത്തും. ആൽഫബെറ്റിന്റെയും ഇന്റലിന്റെയും ഓഹരി വിൽപ്പനകളാണ് ഇതിന് മുന്നിലുള്ളത്.
എഐ നിക്ഷേപം ഉയരുന്നു
എഐ മേഖലയിലെ നിക്ഷേപം അലി ബാബയുടെ സാമ്പത്തിക കണക്കുകളിലും പ്രതിഫലിക്കുന്നുണ്ട്. 2026 ഏപ്രിൽ-ജൂൺ പാദത്തിൽ കമ്പനിയുടെ മൂലധനച്ചെലവ് മുൻവർഷത്തെ അപേക്ഷിച്ച് 75 ശതമാനം ഉയർന്ന് 67.68 ബില്യൺ യുവാനിലെത്തി. ഇതിൽ വലിയൊരു പങ്കും എഐ അടിസ്ഥാന സൗകര്യങ്ങൾക്കായുള്ള ചെലവാണ്. അതേസമയം, കമ്പനിയുടെ അറ്റാദായം 75 ശതമാനം ഇടിഞ്ഞ് 10.5 ബില്യൺ യുവാനായി.
എന്നാൽ എഐ, ക്ലൗഡ് ബിസിനസുകളിൽ അലി ബാബ ശക്തമായ വളർച്ച രേഖപ്പെടുത്തി. രണ്ടാം പാദത്തിൽ ഈ വിഭാഗങ്ങളിൽ നിന്നുള്ള വരുമാനം 45 ശതമാനം ഉയർന്ന് 48.44 ബില്യൺ യുവാനിലെത്തി. ഇപ്പോഴത്തെ നിക്ഷേപങ്ങൾ ഭാവിയിൽ വരുമാനവും ലാഭവും വർധിപ്പിക്കുമെന്നാണ് കമ്പനിയുടെ പ്രതീക്ഷ.
2029 വരെ 380 ബില്യൺ യുവാന്റെ നിക്ഷേപം
എഐ, ക്ലൗഡ് അടിസ്ഥാന സൗകര്യങ്ങൾക്കായി 2026 മുതൽ 2029 വരെ 380 ബില്യൺ യുവാൻ നിക്ഷേപിക്കുമെന്ന് അലി ബാബ നേരത്തെ പ്രഖ്യാപിച്ചിരുന്നു. ഇതിന്റെ പകുതിയോളം ഇതിനകം ചെലവഴിച്ചുകഴിഞ്ഞതായി കമ്പനി അറിയിച്ചു. എഐ കംപ്യൂട്ടിങ് മേഖലയിലെ നിക്ഷേപങ്ങൾ മൂന്ന് വർഷത്തിനുള്ളിൽ ബ്രേക്ക്-ഈവനിലെത്തുമെന്നാണ് സിഇഒ എഡി വുവിന്റെ വിലയിരുത്തൽ.
എഐ മേഖലയിലെ വൻ നിക്ഷേപങ്ങളിൽനിന്ന് വാണിജ്യ നേട്ടം എങ്ങനെ കൈവരിക്കാമെന്നതാണ് അലി ബാബ നേരിടുന്ന പ്രധാന വെല്ലുവിളി. ചൈനീസ് കമ്പനികളും അമേരിക്കൻ ടെക് ഭീമന്മാരും തമ്മിലുള്ള മത്സരം ശക്തമാകുന്ന സാഹചര്യത്തിൽ, പുതിയ ഓഹരി വിൽപ്പനയിലൂടെ സമാഹരിക്കുന്ന 10.2 ബില്യൺ ഡോളർ അലി ബാബയുടെ എഐ തന്ത്രത്തിന് നിർണായക പിന്തുണ നൽകുമെന്നാണ് വിലയിരുത്തൽ.
