ഭക്തരുടെ പണം എവിടെ പോയി? രാമക്ഷേത്ര വിവാദത്തിൽ നിർണായക റിപ്പോർട്ട്
ലഖ്നൗ: അയോധ്യയിലെ രാമക്ഷേത്രത്തിലേക്കുള്ള ഭക്തരുടെ സംഭാവനകളിൽ കോടിക്കണക്കിന് രൂപയുടെ ക്രമക്കേടും തട്ടിപ്പും നടന്നെന്ന ആരോപണത്തിൽ അന്വേഷണം നടത്തുന്ന പ്രത്യേക അന്വേഷണസംഘം (എസ്ഐടി) പ്രാഥമിക റിപ്പോർട്ട് ഉത്തർപ്രദേശ് സർക്കാരിന് കൈമാറി. റിപ്പോർട്ടിൽ ക്ഷേത്ര ട്രസ്റ്റിലെ ഉന്നത ഭാരവാഹികൾ ഉൾപ്പെടെ 17 പേരെ പ്രതിപ്പട്ടികയിൽ ഉൾപ്പെടുത്തിയതായാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.
സംഭാവന പെട്ടികളിലെ പണവും വിലപിടിപ്പുള്ള വസ്തുക്കളും കൈകാര്യം ചെയ്തതിൽ ഗുരുതര വീഴ്ചകൾ കണ്ടെത്തിയതായി റിപ്പോർട്ടിൽ പറയുന്നുണ്ട്. ബന്ധപ്പെട്ടവർക്കെതിരെ എഫ്ഐആർ രജിസ്റ്റർ ചെയ്യണമെന്നും ക്ഷേത്ര ട്രസ്റ്റിന്റെ ഭരണസംവിധാനം പുനഃസംഘടിപ്പിക്കണമെന്നും എസ്ഐടി ശുപാർശ ചെയ്തിട്ടുണ്ട്.ഭക്തർ സമർപ്പിച്ച സംഭാവനകളിൽ നിന്ന് കോടിക്കണക്കിന് രൂപ നഷ്ടമായെന്ന ആരോപണത്തെ തുടർന്നാണ് ഉത്തർപ്രദേശ് സർക്കാർ പ്രത്യേക അന്വേഷണസംഘത്തെ നിയോഗിച്ചത്. സംഭാവനകളുടെ കണക്കെടുപ്പ്, ബാങ്കിൽ നിക്ഷേപിക്കൽ, വിലപിടിപ്പുള്ള വസ്തുക്കളുടെ സംരക്ഷണം തുടങ്ങിയ കാര്യങ്ങളാണ് പ്രധാനമായും അന്വേഷണ വിധേയമായത്.അതേസമയം, സംഭാവനകളിൽ ക്രമക്കേടുണ്ടെന്ന ആരോപണങ്ങൾ ക്ഷേത്ര ട്രസ്റ്റ് നേരത്തെ തള്ളിയിരുന്നു. പതിവ് ഓഡിറ്റുകളിൽ കാര്യമായ അപാകതകളൊന്നും കണ്ടെത്തിയിട്ടില്ലെന്നാണ് ട്രസ്റ്റിന്റെ നിലപാട്. അന്വേഷണം പൂർത്തിയാകുന്നതിന് മുമ്പ് ആരോപണങ്ങളെ വസ്തുതയായി കാണരുതെന്നും സംസ്ഥാന സർക്കാർ വ്യക്തമാക്കിയിട്ടുണ്ട്.
റിപ്പോർട്ട് സമർപ്പിക്കപ്പെട്ടതോടെ വിഷയത്തിന് രാഷ്ട്രീയ മാനവും കൈവന്നിരിക്കുകയാണ്. പ്രതിപക്ഷ കക്ഷികൾ സ്വതന്ത്ര അന്വേഷണം ആവശ്യപ്പെട്ടിരിക്കുമ്പോൾ, കണ്ടെത്തലുകളുടെ അടിസ്ഥാനത്തിൽ തുടർനടപടികൾ സ്വീകരിക്കുമെന്ന് സർക്കാർ വൃത്തങ്ങൾ സൂചിപ്പിച്ചു.
